Parlamentario pa fraccion di AVP, Sr. Arthur Dowers, diamars mainta durante di conferencia di prensa, a ripiti algo cu ya caba pueblo di Aruba ta bon na altura di dje, esta cu Aruba tin un Prome Minister den persona di Evelyn Wever Croes, cu ta masha mentiroso mes.

No solamente cu e lider di MEP kier pretende cu su persona den pasado no tabata envolvi den bendemento di tereno di gobierno di 70 mil meter cuadra pa cifranan cu ta surpasa miyones di dollar, su persona awor como mandatario a gaña ‘werksternan’ di SKOA hincando e hendenan aki den un situacion sumamente dificil.

“No ta ningun secreto mas pa ningun hende, esta cu nos tin un Prome Minister kende ta un mentiroso grandi y un di e pruebanan grandi di esaki, ta cu dos dia prome cu eleccion 2021, ta manda un carta pa SKOA.

Den e carta aki Evelyn Wever Croes ta informa SKOA cu e ta bay di acuerdo pa bin c’un solucion pa werksternan y pa e trahadonan aki ricibi pago conforme loke a wordo palabra cu nan den pasado.

Esaki Evelyn a haci dos dia prome cu eleccion y aki tin cu corda loke ex lider di MEP, Nelsoin Oduber a yega di bisa den pasado, esta cu campaña ta un cos y goberna ta otro cos, ya cu e carta den cual el a informa SKOA riba e palabracion, ta conta cu su firma.

Den e carta e ta confirma cu lo bay oficialisa loke Landsbemiddelaar a palabra cu tur envolvi, esta cu werksternan lo ricibi nan pago normal pero awe trahadonan aki di SKOA, ta para dilanti un realidad caminda nan ta para den Corte, luchando pa algo cu nan a wordo sigura cu nan lo ricibi pa Prome Minister.

E grupo di trahadonan aki ta luchando pa nan derecho den Corte despues cu a bin resulta cu Evelyn Wever Croes a gaña nan hunto cu partido MEP y Minister di Eseñansa Endy Croes.

Pa colmo e mesun Endy Croes aki prome cu el a huramenta oficialmente como Minister encarga cu educacion, a declara cu dentro di tres siman su persona lo soluciona problema salarial di e werksternan.

Mientras tanto un aña a pasa di e promesanan haci pa Prome Minister Evelyn y minister Endy Croes y tin cu duna tanto Ricardo Croes como Rudy Lampe razon ora nan bisa cu nan a wordo gaña den nan cara, ya cu e grupo di werksternan tambe a wordo malamente engaña ya cu no a regla nan salario manera priminti,” Parlamentario Arethur Dowers a trece dilanti.

 

LEAVE A REPLY

Please enter your comment!
Please enter your name here