Recientemente Parlamentario Arthur Dowers a manda un mensahe fuerte y directo pa e actual Minister di Husticia Andin Bikker pa e “ Wake Up and smell the Coffee”. Mirando cu e solo hecho cu Watty Vos Blvrd ta vision/ proyecto di Gobierno di AVP ta algo cu ta haci nan hopi dolor.

Un caretera cu partido MEP y Partido di Otmar Oduber a sali critica fervientemente, mustrando cu semper nan tabata contra di e caretera/ proyecto aki.

No obstante cu e ta haci nan dolor, nan tin cu realisa cu nan ta responsabel si pa garantisa siguridad no solamente riba e caretera aki, pero riba tur otro caretera di pais Aruba, ta locual cu Parlamentario Arthur Dowers ta bisa.

E ta remarca cu tin cu pidi atencion di e gobernante, pa locual ta trata infrastructura y siguridad caminda a trece hopi adelanto cu un hoya di proyecto, pero con pa atende cu e infrastructura nobo tin cu haya su debido atencion. Si tuma nota di e accidente di algun dia pasa unda cu un auto ta alcansa un hoben no mucho leu for di e rotonde di Cumana. E ta nifica cu tin cu aumenta e conscientisacion riba esunnan cu ta uza e careteranan, pero tambe aumenta e control sikiera temporal caminda ta percura cu polis ta guia e proceso y tira un bista riba e trafico.

E presencia di polis no necesariamente tin cu nifica boet / sancion pero mas bien pa pone mas blauw riba caminda pa tene manehadonan na regla y guia chauffeurnan den careteranan cu ta nobo. Mirando cu ta hopi hende cu no a custumbra y ta trece cierto risiconan extra den trafico.

Parlamentario Dowers ta enfatisa riba e hecho cu partido AVP semper a para pa siguridad den trafico. Hopi atencion a dedica y hopi hende poni disponibel na e comunidad pa e aspecto di siguridad den trafico. Dowers ta remarca cu e daño mas grandi cu ta pasa den comunidad lamentablemente ta den trafico. Compara cu tur otro sucedido den comunidad, e daño mas grandi na e ser humano cu consecuencianan mas severo ta den trafico y tin cu tuma cu hopi seriedad.

Remarcabel ta cu e Minister di Husticia aki no ta interesa den trafico.

Ta algo cu el a vocifera den Parlamento, dunando como ehempel cu den nan bista e Gobierno di AVP a perde tempo cu trafico na luga di concentra riba crimen cual tabata algo cu nan a asumi robes. Resultado di e trabou tabata papia pa su mes.

Cambio positivo no ta algo cu a wak for di momento cu nan a sinta como gobierno, al contrario e unico cambio tabata cu a bay atras. Lastimamente e teamnan y esfuerso cu a haci a bay perdi particularmente den trafico.

Un peticion no solamente na gobierno pero na comunidad en general pa nan ta cauteloso riba careteranan, temporada di yobida ta en efecto cu ta trece extra risico, y ta momento pa tene cuenta cu hopi ta esunnan cu no ta custumbra cu e careteranan nobo. Ban mas poco poco, e ta keda na nos mes pa trafica cu cautela pero responsabilidad tambe ta di e mandatario pa percura pa e siguridad den trafico.

Presencia di Polis ta masha poco, logico cu algun ta tuma e via pa yega nan destinacion, pero locual no ta mira ta polisnan/patruya designa na e careteranan nobo cu ta largo y ta crusa den varios districto. Un sugerencia lo ta pa e polisnan di trafico, cu ta esun ideal pa e encargo aki, monitorea e situacion algun dia, aumenta siguridad y limita risiconan.

Un advertencia ta bay na e Minister di Husticia pa e haci su trabou, y stop di drumi ta locual Arthur Dowers a bisa. A pasa mas di dos aña drumi, un persona cu tabata tin hopi gana di bira Minister di Husticia, caminda cu tabata un soño realisa pero parce cu e la realisa y a bay soño tambe. Ta ora pa e lanta.

 

LEAVE A REPLY

Please enter your comment!
Please enter your name here