Ayera parlamentario, Setty Christiaan-Yarzagaray (MEP) a referi riba e mocion cu a wordo produci durante e reunion cu a tuma luga den Parlamento tocante e cambio di ley pa permiti piscamento cu harpun.

El a bisa cu den e caso aki unanimamente a wordo aproba e mocion aki. El a accentua riba e parti unanime, ya cu el a indica cu e problema aki di piscamento cu harpun ta data for di 12 aña largo.

Tratado y spearfishing

Tambe el a referi riba e mocion presenta y presion di Parlamento pa gobierno bin cu un pronto solucion y hiba ‘gedoogbeleid’ pa tolera al menos e piscamento cu harpun aworaki, tanten e ley ta bin full cla. Esaki independiente cu tin tratado cu pais Aruba ta mara na dje y ley cu ta busca protege fauna y flor marino.Parlamentario Christiaan-Yarzagaray a bisa na Bon Dia Aruba cu no ta trata di pasa riba niun tratado y ley relaciona cu proteccion di naturalesa. Tambe como un organo pro estado di derecho nan ta comprende tur tratado.

P’esey den e mocion ta para cu premirando cu gobierno ta haci spearfishing legal. Pero legal kiermen cu gobierno ta tene cuenta cu e parti di tratado internacional, el a laga sa. Pasobra locual nan por haci aworaki ta “djis tolera un momento.” Pues e tolerancia aki ta permiti cu esun cu kier gara pisca por haci’e ya sea pa medio di un hanzue y as of pa medio di un harpun.

E ta haya cu e parti di Medio Ambiente/Naturalesa ta purba mas tanto pa conserva pero defende kico un harpun por kibra, por ehempel evita daño den coral, etc… El a trece entre otro como ehempel cu ora un boto ta hancra eventualmente e por kibra coral. “E hancra ta mas pisa cu e harpun,” el a indica.

Ademas den e concepto di ley cu nan a ricibi ta para e parti di regulacion tambe. Kiermen bao cierto condicionnan bo mag di uza un harpun. E ta sigur cu den e condicionnan ey ta reglamenta na unda y na ki momento bo no mag di haci e actividad aki. E no a descarta e parti di control pa evita un ‘free for all.’ Tambe e persona mester registra su mes y firma cu bao cierto condicion e mag di uza un harpun.Tambe e Parlamentario ta haya cu ta depende di nos mes con consciente nos kier ta riba regulacion y reglamentacion. “Nos tur kier protege, pero tambe protege esunnan cu tin hamber y cu ta biba di tira pisca,”el a laga sa.

Encuanto si Parlamento como organo legislativo ta pone su responsabilidad un banda pa pone presion riba gobierno pa bin cu un solucion di e manera mas lihe posibel. Parlamentario Christiaan-Yarzagaray a admiti cu nan a bin cu presion pasobra e problema aki tin 12 aña. Pero e situacion cu nos ta pasando aden debi na e pandemia di coronavirus ta haci cu e tin un presion extra riba un cantidad di hogar cu ta depende pa provee pa nan famia. E presion no ta pa e grupo di mas cu 44 hende cu a firma e manifiesto, pero nan famia nan kier salvaguardia nan. E ta kere cu por ta e presion aki lo por trece un solucion finalmente.

Gedoogbeleid

Di su banda e parlamentario a trece dilanti cu e por a scucha e comentario cu si e problema aki ta data di hopi aña dicon Parlamento ta presiona gobierno pa bin cu un solucion pronto.

El a argumenta cu esaki ta hustamente pa kico e mocion aki a bin. El a bisa cu e mocion aki a bin pasobra “nos no por keda warda un otro 10 aña pa resolve un problema.” Den e caso aki e problema menciona ta regarda tres diferente ministerio: Husticia, Sector Primario y Medio Ambiente/Naturalesa. Nan a reuni pa di dos biaha pa trata e asunto aki den Parlamento, mirando e hecho cu e piscadonan cu ta haci uzo di harpun a yega di entrega un manifiesto na nos organo legislativo. Pa medio di e manifiesto aki nan ta pidi pa un solucion, considerando cu nos ta den situacion dificil pa causa di e pandemia.

“Den e momento aki dificil ta sumamente importante pa nos tambe por yuda den e proceso. Pa kico? Pasobra tur hende ta depende di un of otro forma riba un gobierno pa sobrevivi…,” el a declara. E parlamentario ta reconoce cu bin cu un solucion no ta facil, mirando e hecho cu e ta resorta den tres diferente ministerio. Pero si nan a pidi e ministernan concerni pa yega na un solucion. Minister di Husticia a priminti Parlamento cu e lo concipia un ley cu ta carga e sosten di sector primario pa haci un concepto di ley pa permiti piscamento cu harpun teniendo cuenta cu tur conseho, specialmente cu e tipo di actividad di piscamento cu harpun ta cay bao ‘onderwaterjachtmiddel.’

Parlamentario Christiaan-Yarzagaray a bisa cu dos minister, esun di husticia y esun di sector primario, a bay di acuerdo cu e concepto aki, pero esun di Medio Ambiente, no ta di acuerdo cu e gedoogbeleid. E parlamentario no ta kere cu un gedoogbeleid ta un free for all, sino cu bo ta tolera spearfishing un rato, y e mocion tambe ta indica esey. Kiermen nan ta tolera premirando cu gobierno ta trahando riba e ley pa esaki wordo termina.

Sinembargo Parlamento kier un solucion y pa medio di e mocion presenta, nan a pidi e ministernan pa denter di 10 dia di trabao yega na un solucion. Cualkier caminda cu nan ta tuma ya sea drechi of robes pa ‘yega Roma’ -segun e parlamentario encuestion- mester yega na un solucion, ya cu e tres mandatario a yega di expresa cu nan kier yega na un solucion.

“Den e caso aki tur tres kier bay Roma, pero den e caso aki nos ta urgi nan pa yega na un caminda si,” el a bisa.

Parlamentario Christiaan-Yarzagaray a reitera cu nan no kier keda otro 12 aña pa purba yega na un solucion. Nan ta spera cu gobierno por cumpli cu e mocion aproba y nan ta keda na expectativa di un solucion presenta den dos siman den nos organo legislativo.