Minister Wever tabata presente den Parlamento pa brinda informacion riba e Landsverordening Regeling Kredietverlening. E ley aki, cu si tur cos ta bon lo drenta na vigor dia 1 di januari 2027, tin como meta pa regula y stipula e interes maximo cu negoshinan por cobra riba prestamonan chikito y tambe negoshinan cu ta financia compra di productonan manera wasmashin, dryer, frishider, television y te hasta iPhone.

Na e momentonan aki, e negoshinan menciona tin e libertad pa pone e interes cu nan ta desea riba un prestamo. Sinembargo, ora e ley drenta na vigor, lo tin un tasa maximo legal stipula. Den e proceso aki, e Minister di Finansa y Economia tin un rol determinante, pasobra e ta e persona encarga pa dicidi kico e tasa di interes maximo ey lo bira.

Frishider Bashi, Pueblo den Crisis!

Parlamentario Oduber a lansa un critica fuerte contra Minister Wever y e Gobierno actual, señalando e falta total di empatia cu tin pa cu e pueblo Arubano. Oduber a expresa, cu e situacion economico na Aruba a yega na un punto critico y e falta di comprension di e mandatario ta bini como un sla duro pa e comunidad. Despues di a hiba un campaña fuerte primintiendo di mehora poder di compra y yena frishidernan bek, e realidad awe ta totalmente opuesto, Oduber a enfatisa.

“Realidad Amargo” cu nos ta biba aden:

Aumento Explosivo: Gasolin, diesel, y gas a subi sin piedad, mandando prijs di tur producto den supermarcado den laira.

Bestaansminimum espantoso: Un famia di 4 persona mester di no menos cu 5551 florin pa luna djis pa cubri e necesidadnan basico.

Sobrevivencia: Mayornan mester core tras di 2 trabao y biba den fiansa continuo djis pa por wanta cabes riba awa.

“Nos a spera mas compasion y comprension pa e grupo delicado aki, pero caminda mester tin empatia, nos ta haya solamente silencio y aumento di costo.” Oduber a expresa. E pueblo no por sigui carga e peso aki mas.

A scoge e interes di mas halto posible!

Minister Wever tabata tin tres opcion riba mesa pa e interes maximo:

Boneiro: Ta usa un tasa di 22%.

Banco Central di Aruba: A conseha Minister pa scoge 22%.

Otro compania di conseho: A propone entre 18% y 20%.

E Consultant di Minister: A conseha e interes di mas halto: 25%.

Minister Wever a opta pa e 25%! Nos NO ta compronde pakico a scoge e tasa di mas halto si e por a dicidi pa un interes mas abao. Aki bo ta mira claramente cu e Minister NO ta sirbi interes di e homber chikito. Laga nan suta e pueblo cu tasa di interes halto numa!

Cu pueblo of Contra pueblo?

Durante e reunion, ora nos a indica cu nos kier un debate publico y presenta un mocion pa reduci e tasa di interes aki, Minister Wever a contesta cu e NO lo sigui e mocion toch!

“Acaso e Minister ta dicidi pa Parlamento awor?” Oduber a cuestiona. Nos lo keda pendiente pa mira si fraccionnan di AVP y Futuro ta bay para cu pueblo, of si nan ta bay contra pueblo den e inhusticia aki!

Dicon Minister Wever a nenga e 18% pa scoge e 25%? Aki bo ta mira ken ta biba pa pueblo y ken ta biba pa suta pueblo numa!

Nota di redaccion: E articulo aki ta opinion di e autor y no ta representa opinion di Bon Dia Aruba.