Palabranan di Parlamentario Desiree de Sousa – Croes, despues cu ya a bira conoci tocante di su futuro den politica ta lo siguiente: “Mi a ripara cu locual cu mi a duna dialuna anochi como entrevista a wordo comprondi robes, e no ta asina cu mi ta bandona partido. Locual cu mi a bisa ta cu mi no ta bolbe bek riba lista y cu mi ta cla cu politica. Mi a purba di tur manera y mi no ta haya cu aworaki algo cu pa mi ta voor de hand liggend ta wordo tira for di bentana etc. Eseynan tin mi molestia, pero no cu mi tin problema cu mi partido of cu lider di partido of cu otro coleganan di fraccion cu a sostene mi.”
A pesar di e anuncio di retiro for di politica, ayera a continua cu planificacion y Sra. De Sousa – Croes a entrega e amienda pa loke ta geregistreerd partnerschap. Bon Dia Aruba a puntra e parlamentario dicon e ta opina cu e ta e miho opcion pa e tuma despues di ta den e lucha pa introduci cierto cambionan pa 2 aña. Mirando cu ya el a yega asina leu pa ta riba lista politico, y ta mustra di ta e unico bos publico den politica cu ta sostene e comunidad di homosexualnan. “Mi ta kere esey riba su mes lo no ta un problema pasobra mi por sigui haci e trabou pafo di politica cual ta mi intencion tambe. Mi lo por pone presion y yuda e causa na un otro manera. Den principio si 22 di augustus tur cos bay bon y e amienda wordo tuma, di mes mi lo keda caba e aña y haci mas cu mi por den e aña pa sigura proteccion di e comunidad. Mi tin un ley mas cu lo wordo trata december mas o menos riba trato igual na pia di trabou cual tambe lo busca fecha p’e.”
Su anuncio riba Facebook Xclusivo Magazine
Contrario na locual cu e pastoor a haci cu a trece odio y division den comunidad, nos como grupo LGBT no ta bay cu odio contra odio, nos ta kere cu amor mester por gana odio. P’esey mi a yama grupo y sostenedonan y campañadonan fiel di mi, pa mi por a papia cu nan y bisa nan kico ta mi decision cu ta te aki y no mas. Segun Sra. De Sousa – Croes el a bisa cu mester tuma e decision te unda kier negocia pa derecho humano. “Mi a haci esey pa 2 aña y mi a papia cu tur hende cu mi por a papia cun’e y mi ta kere cu aworaki ta suficiente. Of bo ta kere den derecho humano, of bo no ta kere den derecho humano. Mi no por convence hendenan cu ta asina leu para di mi y mi no ta pesa di bay hinca energia mas den esey.” Cu hendenan Sra. De Sousa – Croes ta referi na entre otro coleganan den partidonan geel, cora y berde. Mi ta kere cu nan mester sali afo y mustra nan cara na comunidad, el a agrega.
Locual cu Sra. De Sousa Croes ta sinta den su partido claramente ta cu e ta dividi riba e punto aki y ta kere cu nan lo bay vota segun nan consenshi. Tin coleganan cu a bisa cu nan ta sostene e amienda aki y nan a bisa e parlamentario esaki desde comienso cu nan ta kere 100% den derecho humano cual mi a gradici nan y ta admira nan pa para tras di e grupo aki. Tambe otro personanan den comunidad. “Pero no ta tur hende ta para tras di derechonan humano, nan ta sinti cu e ta algo cu tin di haber cu religion, cual mi ta kere cu no tin nada di haber cu religion, simplemente respet pa bo prohimo.” Pa e motibo aki e parlamentario a bisa di ta bay sigui e aña aki si, pero lo no bolbe bek riba lista di niun partido y e ta di opinion cu el a haci suficiente y ta spera cu den futuro un otro persona lo por sigui mas leu. Segun Sra. De Sousa – Croes, e no a kere cu nunca den e partido cu ta cristian – democrata e lo mester a sinta papia di derecho humano 2 aña, cual e no ta bay haci mas y cu ta mescos den partido MEP.
Papa Francisco
Algo cu tambe a hala atencion den media e siman aki relaciona cu e caso di homosexualnan, ta e hecho cu Papa Francisco a bisa diadomingo cu Cristiannan debe palabranan di despensa na tur persona gay cu a wordo ofendi y exploita door di misa.”Ken ami ta pa husga?” El a bisa cu nan no mester wordo discrimina, y cu nan mester wordo respeta y acompaña pastoralmente. E misa mester pidi pa pordon pa no a comporta na varios ocasion. “Ora ta papia di misa mi kiermen Cristiannan, misa ta sagrado pero nos ta pecadornan,” e papa a bisa. E papa a sigui bisa cu misa no mester bisa despensa na e persona gay cu el a ofende, pero tambe na e pober, e muhenan cu a wordo explota, na muchanan exploita pa trabou y tambe pa e uzo di tanto arma.
E palabranan di e Papa Francisco sigur ta algo historico ya cu mientras cu Papa Juan Pablo II a pidi despensa na diferente grupo den añanan 2000, Hudiu, inmigrante, hende muhe entre otro, ningun Papa a yega cerca na pidi despensa na e comunidad LGBT. Pordon ta un parti esencial den e bida di un Cristiaan y actualmente hendenan LGBT ta e grupo cu ta sinti nan mes mas marginalisa den misa awendia.
