Mientras cu partido AVP y su lidercito Mike Eman ta lanta tur dialuna cu plegaria pa pueblo y sigur awe, den tur e momentonan dificil cu pueblo ta bibando, mester recorda cu ta Mike Eman ta e culpabel pa di un manera iresponsabel endeuda e pais aki, sin pensa un dia riba e bienestar di e pueblo, pero solamente riba bienestar propio (ruman a haya 1.6 miyon florin pa auto di careda) y otro coleganan y amigonan.

Pero nos si ta trahando duro pa mehora situacion di pais Aruba y bienestar di pueblo. Y p’esey mi ta hopi contento cu gobierno a lanta riba dialuna cu anuncio di proyectonan unda cu e ser humano ta central.

0% di Aruba lening.
Desde introduccion di Gabinete Evelyn Wever-Croes y tambe den parlamento e enfoke ta pa pone e ser humano central, pero tambe pa locual ta e promesa di campaña unda nos a enfoca pa busca e maneranan pa atrae nos hobennan cu bay studia pa bolbe cas bek y p’asina nos por duna tambe contenido na haci Aruba un isla di conocemento cu nos mesun yiunan di tera. E prome stap a ser tuma awe ora cu Minister di Enseñansa Rudy Lampe a anuncia un di e visionnan di e gobierno actual pa no cobra interes riba e Arubalening. Esaki lo drenta na vigor entrante 1 januari 2020 y ta conta tambe pa esunnan cu ya tin un Arubalening cu ta un peso hopi grandi y alabes un estimulo pa nos yiunan di tera por ta bek na Aruba.

Mocion di reduccion di 50%.
Den parlamento mi persona a entrega un mocion cu a ser aproba cu mayoria absoluto unda cu e mocion aki ta pidi e minister di Economia y Finanzas pa sondea e posibilidad – den bista sigur cu e anuncio di e 0% riba Arubalening – cu e ex studiante cu kier paga su fiansa den un solo biaha por haya un reduccion di 50% di su totalidad. Esaki sigur lo beneficia gobierno pero tambe e ex studiante pero alabes ta haci esaki mas atractivo pa mas yiu di tera bolbe bek nan cas. Mi ta spera cu awo si Gobierno por tene cuenta cu e mocion aki na bienestar di e hende cu mester ta central.

Dialuna di alegria y bon noticia.
Mi ta spera cu tur dialuna nos por anuncia proyectonan na beneficio di pueblo manera ta e anuncio aki awe y no manera partido AVP cu tur dialuna ta lanta ta fomenta rabia den pueblo y purba na crea desunion y tambe kita atencion di e realidad, entre otro di corupcion di ex Ministernan di AVP, Paul Croes (condena) y actualmente Benny Sevinger y hasta parlamento a ground e pasobra e ta un berguensa pa pueblo. Cu positivismo mi tin sigur cu nos lo logra hopi mas.

 

 

1 COMMENT

  1. My comment has nothing to do with the article above: People want to know about traffic rules in Aruba, people are posting questions on social media: I beg who ever is in charge of these issues, do address a way on T.V. maybe to give the public knowledge on traffic rules, and other laws, laws such as a person cannot let their washing machine water run over the streets, she can get a fee. We need more information, how much can it cost to either post videos for us citizens on the T.V. People want to KNOW: knowledge is wealth. And health.

LEAVE A REPLY

Please enter your comment!
Please enter your name here