Parlamentario Endy Croes (MEP): ‘Despues cu el a crea e Mega Debe y e desaster financiero diripiente e sa con pa drech’e’

Parlamentario Endy Croes a splica na varios ocasion – na cualkier momento cu un politico di AVP kende nan a forma parti y a crea e desaster financiero y e Mega Debe – mester trata na manipula pueblo atrobe nos lo t’ey manera soldaatnan riba e pida baranca aki pa corigi nan, clarifica nan manipulacion y recorda pueblo di nan actonan. Mike de Meza ta yora cu cos ta frega. Mike de Meza a lubida hopi lihe cu ta e mes ta responsabel como ex Minister di Finansas pa presta hunto cu Mike Eman 2000 miyon florin? Mike de Meza a lubida cu riba e placa aki cu e mes a presta, pueblo mester paga 232 miyon florin na interes? 

Fiestamento cu placa di RDA.
Mike de Meza a papia di Citgo y un cantidad di peliger, segun Mike de Meza. Mike de Meza a fiesta cu placa di RDA. Mike de Meza a firma un contract pa Richard Arends di 2 miyon florin como CFO di RDA. Mike de Meza a negocia cu tur e coruptonan cual awe hopi ta cera. Laga mi recorda Mike de Meza poco di su fiesta cu placa di RDA sin cu e refineria nunca a habri. Nos tin e lista di su sinberguensuranan den RDA.

Asina AVP a chupa sanger di pueblo.
Tera Group di Patrick Paskel y Speed Afl. 400 mil florin, Horizon Consultancy di Richard Arends Afl. 600 mil florin. Un travel agency Afl. 650 mil na travel expenses. Pues Mike de Meza kier tilda gobierno di ta biaha ? Un compania di zonido Afl. 702 mil florin. Mind Strategy Consultant (nos no sa ken nan ta) Afl. 615 mil. Green Aruba, proyecto di Mike Eman y Mike de Meza sponsership Afl. 200 mil. Green Conference sponsoring Afl. 550 mil. Wubbo Ockels (dfm) tambe a cobra Afl. 130 mil.  Mike de Meza, bo t’ey? Bo ta manera sapatia pa bin bek pa drecha cos. Ta kico realmente bo kier drecha? Ta falta di poder pa boso sigui fiesta y djodjo? Gevolgmachtigde Minister a haya 65 mil florin for di RDA, sin un splicacion. Un tal Jeniree kende tabata traha pa Mike Eman den oficina a cobra Afl. 37 mil florin pa haci kico? Un tal Bianca Peters tambe empleado di Mike a cobra Afl. 26 mil florin. Tur esakinan a cobra na RDA y e Bobbo list ta hopi largo.

Awor net Mike de Meza cu a permiti tur esakinan sa con pa drecha e situacion financiero? Mike, keda bo leu den bo cueba y busca otro trabou pa bo haci. No ta manera cu boso a horta y destrui e baranca aki. Mi lo bin bek riba e fiesta den RDA. Mi ta reta Mike de Meza pa e sali publicamente y bisa cu esaki No ta berdad. Dialuna awor pregunta oficial lo bay den direccion di Prome Minister pa informa con leu e investigacion ta riba RDA y cuanto keho a wordo entrega riba e pandiya di AVP kende nan a horta y malogra Citgo/RDA sin cu nunca e refineria a habri.