“bono” emiti na balor di 60 miyon florin y 60 miyon dollar y NO 400 miyon manera Knops a basa su calculacion

Parlamentario Endy Croes a tuma nota cu Militar Knops ta den pleno campaña na Hulanda como Lider di campaña di partido CDA zuster partij di AVP na Aruba net di e partido cu a causa e desaster financiero na e banda di oceano aki. Mei mei den esaki Militar Knops ta den un disputa cu Aruba y pa no perde cara y admiti cu e forma cu el a atende tanto cu e crisis y mei mei den un crisis kier colonilisa e islanan den Reino Hulandes traves di (2) Rijkswet, Knops a dicidi pa cuminsa core campaña traves di prensa na e islanan pa purba insisti riba su plan.

Knops a emiti un comunicado di prensa carga cu mentira:

Diabierna ultimo un dia despues cu Militar Knops a tene un rueda di Prensa via VNO dedica na Aruba, Militar Knops continuando cu su campaña a manda un comunicado di prensa unda El a duna splicacion riba e Staatsobligatie esta “Bonds” cu Aruba a emiti. En realidad Aruba a emiti /compromete 60 miyon florin y tambe 60 miyon US dollar respectivamente. Pues pa corigi Militar Knops kende hunto cu expertonan di BZK a basa nan calculacion completamente y eroneamente riba 400 miyon florin mester corigi e mentira di Militar Knops y BZK cu pa awor esaki ta trata di 60 miyon florin y 60 miyon dollar na Staatsobligaties esta “Bonds” y no 400 miyon manera nan a indica den nan comunicado di prensa.

Storia di 21 miyon na interes di Militar Knops y BZK no ta klop:

Militar Knops y BZK a basa nan calculacion eroneamente riba 400 miyon y a splica cu esaki lo trece cun’e un suma di 21 miyon florin extra na interes pa aña y nan a compara esaki cu lo aumenta e gasto pa cada con ciudadano cu Afl.1400 florin. Esaki ta otro mentira flagrante di Knops y BZK. Bo mester ta poco mas sincero cu pueblo di Aruba. Desde 2017 Aruba a roga Hulanda pa zachte lening kisas na 1 of 2 % y semper Hulanda a bisa NO. Hasta den Protocol di November 2018 esaki ta hancra unda Knops y Hulanda a nenga Aruba.

Consecuentemente Knops a forsa Aruba sigui presta riba mercado internacional na 5-6% pa por a cumpli cu Aruba su obligacionnan. Aruba a paga 220 miyon na interes durante 2018 y 232 miyon durante 2019 riba placanan presta door di AVP, no obstante tabata pidiendo Hulanda un fabor pa por presta na miho interes. Awor den Pandemia Hulanda kier torno na autonomia di e pais aki y riba dje awor diripiente Militar Knops ta cuminsa preocupa paso Aruba no a firma cu Hulanda y obligatoriamente mester a emiti Bonds pa asina por traspasa lunanan di September y October. Ta cu cual midi Knops y Hulanda ta midi?

Knops falta educacion riba e parti prestamo pa cu un pais:

Knops den su comunicado di prensa a insinua cu lo mester haci “tussentijdse aflossing” pa asina por baha e debe. Aki ta muestra cu Knops no ta domina e materia. Esaki solamente por wordo haci ora ta trata cu prestamo manera hypotheek di cas of prestamo di un auto. Ora ta trata di prestamonan pa cu un pais ta unico manera debe por baha ta momento cu tin mas entrada cu tin gasto conoci como SURPLUS. Ta ora un pais cera aña cu SURPLUS e debe di pais ta baha. Con Knops kier pensa riba “tussentijdse” aflossing pa baha debe si e pais ta cera aña cu un deficit primordialmente awor den e pandemia aki? Bij de les blijven Militair Knops!

Segun Knops Aruba lo figura su mes den Top 10 di mundo:

Segun Knops cu Aruba lo figura su mes den e top 10 paisnan na mundo cu mas tanto debe. Knops basando su calculacionnan riba 400 miyon a splica cu schuldquote di Aruba lo aumenta pa 127% di GDP. Locual cu Knops no a splica ta cu donde sea Aruba presta sea na Merca, na China, na Rusia of na Hulanda e “schuld quote “aki lo aumenta na e mesun manera. Pues no lo haci diferencia di unda e prestamo ta bin. E unico manera cu e schuld quote no lo aumenta ta si Hulanda regala Aruba placa manera nan a regala Italia cu Spaña. Aruba semper a presta y a paga bek y den e caso aki no ta mustrando diferente. Aruba lo presta y lo paga bek. Dicon Militar Knops no por ta mas sincero y trata nos digno pueblo cu mas respet. Stop cu e campaña pa colonilisa nos islanan. Nos por logra hopi cos hunto cu respet pa otro.

LEAVE A REPLY

Please enter your comment!
Please enter your name here