Parlamentario Endy Croes cu gran asombro a lesa un articulo di Mike Eman fin di siman pasa unda Mike Eman na un manera salvahe ta gaña mahos atrobe. Mike Eman ta mescos cu “Hananias” un profeta falso di Babilonia kende kier a manipula y gaña henter un pueblo. Increibel ora tuma nota con Mike Eman kier sigui manipula. Segun Mike Eman cu Mike hunto cu AVP a logra reduci e deficit di 9.3% te rond 2%.  Locual Mike Eman no ta conta pueblo ta na cuanto el a encontra e deficit na 2009 y ta kende a mand’e te ‘tube’ na 9.3% na 2014. 

Record deficit di 9.3% na 2014.
Como cu Mike ta sconde e berdad nos como Parlamentario tin e obligacion pa cu pueblo pa contra aresta cada un di Mike su mentiranan y transforma esakinan cu e berdad pa pueblo por compronde y no cay den trampa ni tentacion politico di e politica anticua cu Mike kier keda hunga. Na 2009 bou di gobernacion di MEP e debe nacional tabata na 43%. Manera cu Mike a tuma over na final di 2009 ya na 2010 deficit a cuminsa aumenta y a alcansa 188 miyon mientras e debe nacional a keda aumenta. Asina Mike a maneha e finansas publico na un manera sin escrupulo. Na 2011 e deficit tabata 325 miyon, na 2012 (443 miyon), na 2013 (333 miyon) na 2014 (406 miyon) y aki Hulanda a cay aden pasobra aki e deficit financiero a bati record di 9.3% di GDP. Pueblo mes por subi website di Banco Central y tuma nota di cifranan real. Asina Mike Eman a presta 2200 miyon (2.2 Biyon) den apenas 8 aña di gobernacion hincando Aruba como pueblo den un situacion fragil y caotico financieramente.

Crecemento economico negativo.
Mike por bula ariba y cay abou pero cifranan no ta gaña. E storia di ‘welga di hamber’ cu a sigui desde cu Mike Eman a haya un KB for di Hulanda ya ta conoci. Mike Eman a tribi di bisa tambe cu AVP a inverti den pais Aruba unda consecuentemente esaki a percura pa un crecemento economico. Otro manipulacion y mentira di Mike Eman y AVP.  Parlamentario Croes ta splica cu den e rapport di Banco Central ta ilustra un crecemento economico negativo esta di -0.5% na 2015 y -0.2% na 2016. Pues esaki ta ilustra hustamente lo contrario na locual Mike a splica como cu ora esaki ta negativo kiermen cu NO tabata tin crecemento economico.

Teoria fracasa di Mike Eman.
Ademas CAFT na dos ocasion den aña 2018 a splica den conferencia di prensa na Aruba cu e manera cu Mike Eman a kere ciegamente den e teoria di economista Paul Krugman pa inverti den un pais den momentonan dificil no a duna resultado y no ta funciona den un economia chikito manera di Aruba y esaki a keda prueba awor (Palabranan di Presidente di CAFT). Pues esaki ta otro mentira flagrante di Mike Eman.

Parlamentario Endy Croes ta termina bisando cu Mike Eman por conta cu su reaccion tur dia y tur momento ora ta necesario pa corigi e mentiranan di Mike Eman, anto cu prueba! Tempo di cauchi baulo ta pa pasado. Mike a traiciona su 7000 votadonan y no a drenta Parlamento pa representa nan pero kier sigui  hunga politica di Avestruz, manipulacion y engaño. No way Hose! Mike Eman, e berdad semper lo alcansa bo mentiranan.