Parlamentario Endy Croes ta splica cu despues di 2 aña di retonan hopi grandi primordialmente financiero pero tambe social comokiera e situacion cu Mike Eman a laga Aruba aden tabata un Aruba na rand di bancarota.  

Nos por a tuma nota cu gobierno a cuminsa logra cosnan grandi pa henter e pueblo. Minister President ta trahando cu alma y cuerpo saliendo for di e punto di bista cu e hende mester ta central y ta dirigiendo su gobernacion y Ministernan riba e rumbo aki.

Recientemente Minister Presidente Evelyn Wever Croes a anuncia un reduccion di tarifa di coriente cu 10% pa pueblo, 9% pa Fundacionnan, Schoolnan y Misa y 7% pa comercio. Pa pueblo esaki ta significa 300 florin pa aña pa un persona cu ta paga averahe 250 florin pa luna.

Awe Minister Danqui Oduber a anuncia un aumento di pensioen desde 1 di januari 2020 pa pareha y pa soltero. Pensioen pa soltero ta aumenta di Afl. 1132,- pa Afl. 1157,- esta un aumento di Afl.25,-. Pensioen pa pareha ta aumenta di Afl.1906,- pa Afl. 1948,- y pues un aumento di Afl. 42,-  mientras pensionnan pa huerfano y viudo tambe lo wordo adapta cu e mesun porcentahe.

Parlamentario Endy Croes ta felicita Minister Danqui Oduber cu e logro aki y asina poco poco, pero sigur ta treciendo e alivio tan espera bek den cartera di nos pensionadonan. Aña pasa tambe a reduci e bijdrage di AZV di 10.5% pa 6.5% pa nos grandinan. Segun Croes e prome dos añanan di gobernacion tabata sumamente dificil y kisas hasta un poco inpopular comokiera cu mester a tuma decisionnan grandi pa cuminsa paga e “DEBE” di Mike Eman y AVP.

Nos no lo lubida cu Mike a presta 2200 miyon florin y pueblo ta pagando 232 miyon pa aña solamente na interes. Tampoco mester lubida 80.9 miyon na proyectonan PPP cu pueblo mester paga pa 20 aña largo. Ta fresco den nos memoria con Mike a grita den Parlamento cu e ta orguyoso di e debe y e debe t’ey pa henter pueblo bay page. Surpasando e desaster di Mike y AVP e Gobernacion aki a logra pa cuminsa reparti e placa di pueblo pa pueblo bek. Pabien Gobierno y ban keda enfoca riba e hende ta central pa e recursonan por yega bek den tur hogar y den tur skina aki na Aruba, Croes ta termina bisando.

 

LEAVE A REPLY

Please enter your comment!
Please enter your name here