Parlamentario Evelyn Wever-Croes: “Mi ta spera di un Secretario di Estado cu ta encarga di Relacionnan di Reino cu e ta basa su mes riba hecho”

Ayera, mediante un declaracion oficial, lider di MEP, ex-prome minister Evelyn Wever-Croes a rechasa comentarionan di Secretario di Estado pa Relacionnan di Reino, Eric van der Burg, bisando cu e comentarionan di Van der Burg “no ta berdad.”

“Secretario di Estado Sr. Van der Burg a declara publicamente cu ami, como Prome Minister, a duna instruccion na ambtenaarnan pa prepara HOFA. Esaki no ta berdad.

“E hechonan ta documenta y disponibel publicamente:

“E iniciativa pa un Rijkswet di supervision financiero pa Aruba a bini for di banda Hulandes bou di Secretario di Estado Raymond Knops. E Raad van State di Reino a duna su conseho riba e proposicion dia 10 di maart 2021. E proposicion a wordo entrega formalmente na Tweede Kamer dia 9 di februari 2022. Knops mes a confirma cu esaki tabata su meta: establece un supervision financiero via Rijkswet pa Aruba.

“Tur esakinan por wordo verifica den e documentonan oficial di parlamento y e conseho di Raad van State di Reino.

“Mi ta spera di un Secretario di Estado cu ta encarga di Relacionnan di Reino cu e ta basa su mes riba hecho,” e declaracion oficial di Wever-Croes ta finalisa.

Comentarionan di Van der Burg

Den comentarionan cu Bon Dia Aruba a publica den nos edicion di dialuna ultimo, Van der Burg a bisa cu hopi di e inquietudnan cu tin na Aruba no mester ta dirigi na su persona, sino na Gobierno di Aruba cu ta esun cu tin cu splica y ta responsabel pa e maneho financiero di Aruba. El a enfatisa si na varios forma cu e ta compronde cu Sra. Wever-Croes ta den un funcion di oposicion awor, pero cu e palabracionnan pa yega na e HOFA a keda formula pa gran parti tempo cu e awor lider di oposicion tabata Minister President di Aruba.

“Mi ta totalmente desacuerdo cu Hulanda kier mina autonomia di Aruba pa medio di HOFA. E proceso aki a keda inicia pa ex-Prome Minister Evelyn Wever Croes kende ta esun cu a duna instruccion na ambtenaarnan di Aruba, mescos con nos a duna instruccion na ambtenaarnan na Hulanda pa yega na e proposicion di ley. Mi no ta bisa mucho di su posicion actual. No ta mi asunto. Ami no ta papia di kico ta sosode den Parlamento di Aruba, ni tampoco kico ta sosodiendo cu sindicatonan. Si ta un hende cu mester duna comentario riba e dos aspectonan aki ta Prome Minister di Aruba y no e Secretario di Estado di Hulanda. Pasobra di otro forma, lo mi ta actuando robes.”