Ya ta 7 aña caba cu FADA mediante ‘Red Ribbon Week’ ta conscientisando principalmente hobennan ariba e consecuencianan cu abuso di droga y otro habitonan negativo lo por tin riba nan bida. E ta un conscientisacion di un siman, cuminsando dia 21 di october proximo unda cu ta uza diferente forma creativo y di mas atractivo pa e hobennan por pone atencion na e problematica di adiccion.

E aña aki e lema ta: send a message, stay drug free! Y netamente esey ta e mensahe cu nos kier manda for di parlamento hunto cu FADA, pa nos comunidad, keda liber di droga!

Mas cu un mensahe, nos a tuma accionnan.
A traves di Social Crisis Plan, un plan di 32 miyon florin cu parlamento di Aruba a sostene den su mayoria. Tin diferente accion cu ta y a wordo implementa caba ariba e tematica di adiccion y problema mental. Pa keda na uno, esaki ta Fundacion Anti Droga Aruba (FADA), un fundacion cu tambe a wordo inclui den e Social Crisis Plan. Tin di splica ariba e continuacion y e apoyo pa e proyecto BE SMART. Esaki ta un programa hopi elabora, ariba con ta cambia e conducta cu ta hiba e individuo na adiccion. Sea ta gambling, droga, videogames of otro habitonan negativo, manera humamento. E idea ta pa siña e hoben con pa e haci un miho escogencia ora cu e topa su mes den situacionnan dificil cu e ta pone bou di hopi presion. Y tambe ta trata na involucra mayornan den e proceso aki.

Mayornan tin di keda papia cu na yiunan.
Den sondeonan cu a wordo haci na Merca, ta mustra cu un cantidad di 42% di hobennan cu nan mayornan ta splica nan regularmente ariba e consecuencia di abuso di droga, no ta scoge pa uza droga. Esey ta nifica cu ta bon pa tur mayor, haci di nan banda cada biaha cu e chens presenta, entre nan y nan yiu(nan), pa splica nan di e consecuencianan cu abuso di droga, humamento y gambling ta trece cune. No por keda sin menciona cu e Crisis Plan Social tambe a enfoca ariba e FACT – Team cu tin un concentracion special pa hobennan y lo ta un ayudo grandi pa e famianan, cu mester di e apoyo aki den nan mes seno familiar. Cu otro palabra tin hopi atencion pa hobennan den e maneho aki.

E problema ta grandi.
E problema ta grandi, pero for di parlamento nos ta keda enfatisa cerca gobierno cu nos tin di keda traha pa logra tin exito. Gobierno di nan banda, special minister Dangui Oduber di Salubridad, ta atendiendo e problema aki den un forma integral, pa asina por logra exito duradero. E problema ta uno serio, creciente y nos no por keda sin atende esaki sin mas, pa ningun motibo, sea financiero of maneho di personal manera Caft kier pretende. P’esey na cada oportunidad cu presenta, hasta manera esaki di ‘Red Ribbon Week’ mi ta haci uso di e oportunidad pa apoya e causa pa evita cu un otro ciudadano ta cay venci pa e gara di adiccion. Laga nos apoya FADA den e siman aki di ‘Red Ribbon Week’ participando na e siman di ‘bisti na locura’ y alabes desea nan hopi exito cu esaki. Nos ta invita nos comunidad pa participa activamente, pasobra nunca bo por sa cu e apoyo aki di conscientisacion, bo lo por salba un bida for di e gara di adiccion, Tevreden a termina bisando.

 

LEAVE A REPLY

Please enter your comment!
Please enter your name here