Den un carta cu parlamentario di partido MAS, Marisol Lopez-Tromp a publica riba su rednan social, el a indica cu siendo cu oposicion (fraccionnan di MAS, ACCION 21 y AVP ) a pidi pa un reunion publico riba e contract cu Eagle LNG.
El a splica cu Den un ‘ Openbare Bijeenkomst’ un parlamentario no por usa niun ‘tools’ pa coregi Gobierno, no ta posibel pa debati cu minister, no ta posibel pa presenta un mocion pa expresa un deseo of pa coregi Gobierno, no por presenta un mocion pa baha un minister, sino cu solamente por sinta, scucha y wak e presentacion di e minister Glenbert Croes.
Ademas, el a trece dilanti cu “por cierto legalmente no ta e minister encarga cu Energia, esey ta Minister President. ¿Awo ta con Minister Croes por bin duna un presentacion den Parlamento si e no a ni lesa e contract? Pakico un presentacion despues cu ya a firma y mara Aruba?” Lopez-Tromp a expresa.
Tambe, el a expresa cu “tin un mentira den e Oproep di Parlamento pa e reunion. Fraccionnan di MAS, ACCION 21 y AVP pues NO a pidi un Openbare Bijeenkomst, pero pa un reunion publico pa pueblo por haya transparencia por medio di un debate y caminda parlamentarionan por usa nan poder cu pueblo a duna nan pa represent’e y actua” el a finalisa.
