Recientemente lider di Fraccion di POR, Marisol Lopez-Tromp tabata invitado na Universidad di Aruba pa duna un lectura na e studiantenan di prome aña di e modulo Organization cu ta siguiendo e estudio di Organization, Governance and Management.

E modulo aki ta un introduccion na e obhetivo nucleo di e estudio cual ta gobernacion, maneho y organisacion y tambe un introduccion na enfoke principal, esta e disciplinanan di administracion publico y ciencianan organisacional.

Lopez-Tromp a keda hopi satisfecho di e lectura y intercambio aki cu debi na e interaccion cu e studiantenan tabata asina interesante cu a surpasa 2 ora y di cual el a haya un feedback hopi positivo. “E tabata hopi leuk mes” e parlamentario a expresa. “E studiantenan ta haya un cifra pa nan participacion basa riba nan preguntanan haci den e charla y nan preguntanan tabata na un nivel hopi halto y por ripara tambe cu nan ta envolvi y interesa den e ramo aki”.

Temanan inicial cu a papia riba nan ta: e responsabilidadnan di un minister, e relacionnan entre e ministernan den un gabinete, e relacion entre un minister y su conseheronan y ambtenaarnan, e rol di Parlamento ora ta trata e tareanan di e minister, con un minister ta prepara y ehecuta su maneho, ki impacto politica tin riba bida di un minister y e relacionnan cu e otro paisnan den Reino Hulandes, entre otro.

E studiantenan tabata hopi motiva y interesa, segun Marisol Lopez-Tromp, “nan kier a a haya sa hopi di e parti practico di politica. Ma papia hopi cu nan di mi experiencia den politica, di e diferente funcionnan cu mi tabatin. Mi a bay for di ora mi a bira miembro di Parlamento na 1997 bin ariba, di mi posicion como minister di tres cartera durante 8 aña, kico esey ta significa y con e trabou tabata”. Tambe el a conta e studiantenan di su experiencia como parlamentario independiente dos biaha, riba e rol di Presidente di Parlamento y tambe riba trayectoria di e diferente partidonan. “Mi a bay hopi open riba esey, a splica kico a significa di por a traha den varios y pakico mi a keda den politica”.

Lopez-Tromp a contesta varios pregunta tocante leynan, e diferente rolnan cu e tabatin, proyectonan realisa, cual di nan tabata su faborito. Tambe tabatin preguntanan mas di contenido riba aspectonan di Parlamento, di minister, di finansas, CFT entre otro. Sigur temanan hopi interesante y cu claramente ta demostra e conocemento di e studiantenan riba e situacion di nos pais.

E comentarionan cu Marisol a haya for di esunnan encarga a cay hopi na agrado di e parlamentario mirando cu e studiantenan a indica cu nan a gusta con Marisol a conta tur cos for di curason y cu nan ta considera cu e ta para pa loke e ta kere aden.

LEAVE A REPLY

Please enter your comment!
Please enter your name here