Dia 5 di maart 2020, Comision Fiho di Labor y Sector Primario di Parlamento, cual Parlamentario Tromp-Lee ta presidi, a reuni cu Minister Dangui Oduber y AHATA.
‘Ami ta Turismo’
Punto principal di agenda tabata pa trata e programa ‘Ami ta turismo’. Esaki ta un programa crea pa AHATA, sosteni pa Minister di Turismo, cu tin como meta pa conscientisa comunidad di tur e oportunidad y beneficionan cu tin ora bo ta traha den e industria turistico. Na mes momento kier crea e orguyo pa traha den e industria aki. En total lo tin 15 video cortico, di personanan local cu ta traha y tin un carera den e industria aki. Ya caba a presenta 3 di e video corticonan aki y cada diamars y diahuebs nos dilanti lo lansa uno nobo.
Den turismo tin hopi oportunidad
Parlamentario Tromp-Lee ta indica cu e ta aplaudi y sostene e programa di AHATA mirando cu e industria turistico ta e caminda cu tin mas necesidad di trahado pa yena cuponan di trabou existente y sigur no menos importante e echo cu den un futuro cercano lo ta e sector cu lo crea mas cupo di trabou. Mas y mas companianan den e sector aki tin problema pa haya trahado. Y sigur e programa aki por yuda den esaki.
Retonan den e industria turistico
Tromp-Lee ta indica cu mas cu claro a haci uzo di e oportunidad pa a trata diferente otro topico riba tereno laboral relaciona cu e industria turistico por ehempel:
– Necesidad di trahado
– Problematica pa haya trahado
– Aansluiting di Enseñansa na necesidad di Mercado laboral
– Prepara nos hobennan cu ta termina Scol miho pa nan por subi mercado laboral
– Pago salarial den e industria aki.
Pa conclui Parlamentario Tromp-Lee ta remarca cu sigur e reunion tabata uno fructifero y ya a palabra topico pa un siguiente reunion cu AHATA y dia 12 di maart venidero Minister Oduber lo t’ey bek pa un otro reunion cu e comision.
Comments are closed.