Parlamentario Sue-Ann Ras (MEP): ‘Despues di casi 10 aña Surinam a tuma iniciativa pa reanuda Plan di Contacto’

ORANJESTAD – Recientemente un delegacion di parlamento di Comision di Asuntonan di Reino di Aruba, Corsou, St. Maarten y Surinam a bini hunto, a base di un invitacion y iniciativa di parlamento di Surinam, pa reanuda e plan di contacto, cu ta existi for di aña 2001. “E parlamentarionan di e 4 paisnan aki a demostra di tin interes mutuo pa traha riba diferente aspecto y ta determina pa continua cu e forum aki, pa discuti e areanan di interes mutuo, miho practica y intercambio”, segun parlamentario Sue-Ann Ras.

Protocol 2009
Na 2009 tabatin un protocol di cooperacion cera entre Surinam, Aruba, Antias Hulandes. E lasonan di intercambio no ta algo desconoci y varios pais ta traha riba esaki, pa asina yuda crea mas oportunidad pa desaroyo di e paisnan en cuestion como tambe crea oportunidad nobo pa futuro. Mester remarca cu e dianan tabata hopi fructifero, ya cu parlamento di Surinam a percura pa e paisnan en cuestion haya un bista hopi amplio tocante kico ta tur e areanan y e topiconan cu nan tin interes den dje y cu ta desea pa reactiva e contactonan necesario. “Ta remarcabel cu ta despues di casi 10 aña esaki ta tuma luga, percurando pa e plan di contacto ta den un contexto completamente nobo y innovativo” Ras a indica. E renobacion di e Plan di Contacto aki tabata necesario segun presidente di parlamento di Surinam, drs. Jennifer Simons, door cu e posicion politico di algun di e paisnan a cambia.

Topico relevante
Durante e bishita  na Surinam a bin varios  topico relevante dilanti. “Pero loke a resalta durante e reunionnan tabata e topiconan den e area di agricultura, cria y pesca, educacion, cultura y deporte y eco turismo. E relevancia di medio ambiente y ‘rampenbestrijding’ tambe tabata topico di interes y discusion. E trahamento hunto sigur tin un bon base, mirando cu tur pais en cuestion ta comparti e mesun historia. Surinam a ilustra nan potencialidad den cada un di e areanan y kico tur ya nan ta haciendo y con e ta hinca den otro y kico ta e posibilidadnan pa den futuro traha cu e paisnan: Aruba, Corsou y St. Maarten”, Ras a finalisa bisando.