Parlamentario Xiomara Maduro den un serie di articulonan titula “Den e debate riba HOFA” ta comparti informacion importante pa e debate publico riba e Ley di Reino HOFA. Den e articulo aki, e pregunta central ta: Ken ta dicidi ora Aruba no ta di acuerdo cu un desicion tuma pa Hulanda?
No tin un tribunal independiente ni un areglo di disputa den Reino
Den Reino Hulandes no tin un tribunal constitucional cu por dicidi riba un conflicto entre e paisnan. Tampoco no tin un areglo di disputa of geschillenregeling pa resolve e desacuerdo riba autonomia, igualdad of interpretacion di e Statuut. Ora tin un conflicto, no tin un arbitro neutral cu por duna e ultimo palabra.
Diferente interpretacion di e Statuut
Un ehempel importante ta articulo 36 di e Statuut. E articulo aki ta bisa cu e paisnan den Reino mester yuda otro. Aruba y Hulanda a interpreta e significado di articulo 36 di diferente manera durante e pandemia.
Aruba ta bisa: Reino mester yuda. Aruba ta mira esaki como un deber di solidaridad den momento di crisis.
Hulanda ta bisa: yudansa por bay cu condicionnan, y p’esey Hulanda a pone condicionnan severo na e apoyo financiero. Entre otro: corta den salario di empleadonan publico, corta den remedi di AZV, forsa reformanan den e Landspakket, y exigi pa cambia e supervision financiero di Aruba di un ley di Aruba pa un Ley di Reino. Ademas, Hulanda a cobra un interes halto di 6,9% riba e fiansanan di covid, y a uza esaki pa pone presion riba e negociacion riba HOFA.
Den un situacion asina ta cual Pais a interpreta articulo 36 di Statuut corectamente?
E pais cu tin mas poder ta domina
Ora no tin un instancia independiente pa resolve un disputa entre e paisnan, e pais cu tin mas poder hopi biaha ta keda cu e ultimo palabra. Hulanda tin mas influencia den e institucionnan di Reino, tin mas minister den Rijksministerraad y tin mas poder politico y financiero. Esaki ta crea un desbalansa entre e paisnan. Den e situacion di HOFA, Hulanda na fin di dia ta e pais cu tin mas poder, ta domina e discusion y por interpreta e autonomia di Aruba manera cu e kier.
Tin un deficit democratico
E realidad ta cu den Reino Hulandes tin un deficit democratico. Decisionnan importante pa Aruba por wordo tuma den organonan di Reino, mientras cu Aruba no tin e mesun influencia cu Hulanda. Ademas, ainda no tin un mecanismo independiente pa resolve conflicto entre e paisnan.
E pregunta ta keda
Ora Aruba y Hulanda no ta di acuerdo riba e significado di e Statuut: Ken ta dicidi?
Te cu awor, no tin ningun instancia independiente den Reino cu por duna e ultimo palabra. Y pa e motibo aki ta importante pa den e debate riba HOFA nos keda puntra, ken tin e ultimo palabra y si locual ta wordo dicidi ta corecto si of no.
Nota di redaccion: E articulo aki ta opinion di e autor y no ta representa opinion di Bon Dia Aruba.
