Parlamento a debati propuesta pa cambio di ley cu ta regula salario maximo pa oficialnan top

Ayera, Parlamento di Aruba a tene un reunion pa duna nan sentimento tocante e propuesta di gobierno pa revisa e Landsverordening Normering Topinkomens (LNT), cu ta regula e remuneracion pa oficialnan top den sector publico y semi-publico di Aruba.

Minister di Finanzas, Geoffrey Wever (Futuro) a pidi Parlamento pa duna su punto di bista riba cuatro cambio proponi, incluyendo saca cierto compania propiedad di gobierno for di e ley, y reemplasa e salario maximo actual cu un sistema diferencial.

E reunion publico, OV No. 20, a tuma lugar specificamente pa discuti e opinion di Parlamento tocante e revision proponi. E solicitud di gobierno ta bay back na juni, mientras MEP subsecuentemente a solicita un reunion publico pa discuti e propuestanan y obtene mas informacion for di gobierno.

LNT a drenta na vigor na juli 2022. Den su carta pa Parlamento, minister Wever ta bisa cu a introduci e ley bao presion significante for di Hulanda como parti di e condicionnan conecta na asistencia financiero durante pandemia di Covid. E minister ta argumenta cu consecuentemente, varios componente esencial no a keda regula adecuadamente.

Documento di gobierno Hulandes di e periodo menciona ta confirma cu limita entrada top tabata un condicion mara na sosten di likides. Na mei 2020, Conseho di Minister di Reino a dicidi cu entrada di oficialnan top den sector publico y semi-publico mester ta limita na 130 porciento di e salario standarisa di Prome Minister. Na maart 2022, a pidi Aruba y Corsou pa urgentemente tin e legislacion relevante na vigor pa 1 di juli e aña ey.

Cuatro cambio proponi

E prome cambio proponi pa gobierno ta pa retira companianan propiedad di gobierno for di LNT.

Segun carta di minister Wever, companianan asina generalmente ta opera comercialmente y den un ambiente competitivo. Gobierno ta argumenta cu standard di salario deriva directamente for di sector publico no ta necesariamente apropia. Na su lugar, Pais Aruba, como accionista, lo eherce control riba remuneracion.

Pa preveni aumento incontrola di salario, gobierno ta propone pa desaroya un sistema standarisa pa posicionnan top usando benchmarking internacional pa determina salario segun mercado.

Esaki tambe por ta mara na legislacion planea pa corporate governance.

E di dos propuesta lo reduci aplicacion di LNT riba otro entidadnan legal.

Bao di e cambio proponi, APFA, FCCA, Stichting Ziekenverpleging Aruba (cu ta opera Hospital) y Fundacion Servicio Laboratorio Medico Aruba no lo cay bao LNT mas. Gobierno ta propone pa pone mas enfasis riba si entidadnan ta ricibi subsidio di gobierno of financiamento pa un parti esencial di nan actividadnan.

Un di tres cambio lo elimina e lista di entidadnan actualmente mara na LNT y regula esaki na un nivel legislativo mas abao.

E di cuatro propuesta ta trata e remuneracion maximo mes.

E maximo tabata originalmente Afl. 329.000 y, segun carta di e minister, mediante indexacion a keda aumenta na Afl. 369.000 pa 1 di januari 2025. E ley existente ya ta permiti excepcion bao condicionnan estricto, pero gobierno ta propone pa reemplasa e maneho actual cu un sistema diferencial y na midi, cu ta refleha miho e condicionnan den e region.

MEP ta pidi evaluacion prome

Durante e reunion dialuna, lider di MEP, Evelyn Wever-Croes a bisa cu e fraccion no ta opone remuneracion adecuado pa oficialnan top, y no ta considera e LNT existente perfecto. Posicion di MEP ta cu gobierno mester haci un evaluacion comprensivo prome cu pidi Parlamento duna su opinion riba cambio substancial.

“Nos no ta bisa cu e alto funcionarionan di e entidadnan no por wordo paga bon. Nos no ta bisa cu e ley di LNT manera e ta awo ta perfecto,” Wever-Croes a bisa.

Segun e parlamentario, e cuatro propuesta ta mas cu un amienda tecnico pasobra nan lo cambia e alcance di e legislacion como tambe e metodo pa determina remumeracion maximo.

MEP ya a expresa e preocupacionnan aki den su solicitud na juli pa un reunion publico. E fraccion a declara cu no a ricibi, entre otro, tur opinion relevante di organonan di conseho, un evaluacion financiero di e cambionan proponi, informacion tocante compatibilidad cu acuerdonan anterior cu Hulanda, of un bista completo mustrando cua entidadnan si lo keda cubri pa LNT.

Wever-Croes tambe a referi na e posibilidad existente pa otorga excepcion bao di LNT y a cuestiona pakico kita tur compania propiedad di gobierno for di e ley ta necesario si ya ta posible pa haci excepcion individual.

MEP a pidi un evaluacion cu ta cubri e implicacionnan financiero y aspectonan di corporate governance di e cambionan proponi. E fraccion tambe a solicita criterionan cla splicando cua entidadnan lo keda cubri y con lo controla nan remuneracion.

Wever-Croes a bisa cu si gobierno bay door cu e cambionan proponi sin un evaluacion asina, MEP lo prefera pa trek in henter e ley di LNT en bes di retene legislacion cual su alcance y standard no ta suficiente cla mas.

PPA ta busca detaye riba sistema nobo

Parlamentario di PPA, Eduard Pieters tambe a pidi gobierno pa mas detaye tocante e sistema proponi.

Pieters a solicita un lista cla di directornan di compania di gobierno cu no lo cay mas bao di LNT. E tambe a lanta pregunta tocante e posicion di institucionnan manera Aruba Tourism Authority (A.T.A.) y Banco Central di Aruba, y si e ley lo afecta nan habilidad pa recluta personal specialisa.

PPA a enfoca particularmente riba e propuesta pa standard diferencial y na midi pa salarionan. “Con nos por evita cu e ta bira un ‘abo si, abo no’”? Pieters a puntra referiendo na e necesidad pa criterio obhetivo determinando ken lo ricibi remuneracion mas halto cu e limite actual.

Pieters a puntra ki posicion lo cualifica pa e diferente limitenan, con e limitenan ey lo keda calcula, ken lo determina nan, y ki criteria lo usa. E tambe a puntra kico gobierno kiermen ora di compara Aruba cu “region”, y ki pais of mercado lo forma e base di comparacionnan asina.

Pieters a conclui cu Parlamento lo mester di “transparencia total” prome cu duna sosten na e cambionan proponi.

E carta di gobierno for di juni ainda no ta contene un modelo completo pa e sistema proponi di salario diferencial. E ta declara cu, prome cu bay door cu e amiendanan, e minister kier a obtene opinion di Parlamento tocante e cuatro propuesta.

E reunion ayera pues ta parti di e proceso prome cu cualkier eventual amienda di LNT. E propuestanan discuti no ta e amiendanan mes ya adopta den ley; mas stap legislativo lo ta rekeri pa cambia e sistema existente.