Parlamentario Ady Thijsen (MEP)

Parlamento di Aruba ainda no a trata un propuesta di un bufete legal basa na Washington DC, Choharis Law Group, cual parlamento di St. Maarten a acerca pa asisti cu finalisacion di e proceso di descolonisacion di e islanan di ex-Antias Hulandes y busca reparacion di Hulanda.

Intencion ta pa inclui Corsou y Aruba den e proceso, y cada un di e tres isla lo mester paga un suma fiho di $7mil pa luna, cual e bufete legal ta bisa ta representa un descuento di 91 porciento. Te cu recientemente, Corsou tampoco a trata e propuesta.

Presidente di parlamento di Aruba, Ady Thijsen a bisa corant di St. Maarten, The Daily Herald: “Nos no a trata e propuesta aki ainda, pero e ta un punto cu nos a considera y lo discuti.”

Segun un articulo den Curaçao Chronicle ayera, e movida di parlamento di St. Maarten pa acerca e bufete legal a atrae algun critica localmente, pero presidente di parlamento di St. Maarten, Rolando Brison a bisa recientemente cu e presidium di parlamento tin derecho di participa den sosten legal y a referi na preocupacion tocante e propuesta como simplemente opinion.

Brison a bisa cu e idea ta pa comparti e costo entre e tres pais unabes cu esaki ta finalisa, pero a indica cu ainda ta negociando cu Corsou, Aruba y e bufete. “E propuesta ta djis esey – un propuesta,” Brison a bisa.

Segun Curaçao Chronicle ta reporta, Choharis Law Group a manda e acuerdo pa Corsou, Aruba y St. Maarten na parlamentario di St. Maarten, Grisha Heyliger-Marten dia 1 di october ultimo, y na su bes el a manda esaki na Brison y vicepresidente di parlamento William Marlin. Tambe a manda e propuesta pa Corsou y Aruba.

Den e acuerdo ta bisa cu e bufete legal lo provee servicio legal incluyendo conseho, conseho strategico, negociacion y servicionan similar solicita pa e paisnan pa protege y promociona nan meta y interesnan y pa logra nan obhetivonan.

E prome accion lo ta pa busca esfuersonan den Nacionnan Uni y cuerponan internacional. E bufete legal lo asisti e paisnan pa tuma contacto cu Comite Special riba Descolonisacion di Nacionnan Uni, e Grupo di Trabao di Expertonan riba Hende di Descendencia Africano, y na e Rapporteur Special riba formanan contemporario di racismo, discriminacion racial, xenophobia y intolerancianan relaciona. Lo pidi e cuerponan aki pa examina y reporta riba e situacion di e tres islanan Caribense.

Ademas, e bufete lo asisti e paisnan pa busca reparacion di Hulanda pa e lesion y privacion cu e Hulandesnan a infringi riba e islanan y nan pueblo durante colonisacion y sclavitud Hulandes, violacionnan di obligacionnan legal internacional den periodo despues di Segundo Guera Mundial, y e legado di daño cu lo continua afectando e islanan y nan ciudadanonan den futuro cercano, segun e relato di Curaçao Chronicle.

LEAVE A REPLY

Please enter your comment!
Please enter your name here