E titulo di e Editorial aki ta loke hopi di nos ciudadanonan tambe ta pensa den e dianan aki, unda nos ta den e crisis mas grandi di nos historia, anto algun ministro hunto cu un parti di parlamento, ta parce cu no tin nada drechi di haci cu tuma un problema menor pa haci algo grandi, pa hustifica cu mester kita un ministro rival for di caminda.

Diahuebs anochi, a trata di pasa un mocion di desconfianza contra e ministro encarga cu Desaroyo Teritorial, Infrastructura y Medio Ambiente, basa aparentemente riba e suposicion cu e no tabata dispuesto di implementa e maneho di tolerancia (‘gedoogbeleid’) encuanto ‘spearfishing’. Mas patetico ta cu ora tabata visto cu no tabatin un mayoria den e edificio, a purba enscena un votacion cu tabata viola regla basico di parlamento. Esaki ta e nivel cu nos mester?

Ta realmente increible cu ta trata di pone continuacion di un gobierno na peligro, den e situacion cu nos ta, pa algo asina trivial. No pa promer biaha, ni pa ultimo, nos ta bisa cu piscamento cu harpun no ta un actividad economico, sino un pasatiempo deportivo. Tin piscador cu ta bay lama tur dia, pero nan ta bay cu harpun? Ta interes di cuanto hende ta defendiendo? Di otro banda, tin diesmiles di hende cu a perde nan trabao y nan entrada. E manyen di hende cu eventualmente ta biba di spearfishing tambe ta bin na remarca pa haya e ayudo cu e miles ey ta haya.

Claro cu nos ta comprende cu tin mas interes hinca tras di e asunto aki; ta pesey a hinca e posibilidad di facilita permiso pa bay huur equipo di spearfishing den e Landsbesluit cu cual e ministro di Husticia a bin, apoya pa su colega di Sector Primario. Mester bisa cu e mandatario di Husticia a busca argumento y a kere di e haya esaki den e caso di Saba, unda ta permiti spearfishing limita na e localnan. Pero nos ta compara aki un isla cu menos di 2000 habitante cu un isla di 115.000 habitante. Na Saba, cu ta mas chikito cu Parke Arikok, control riba piscador ta hopi mas simple, mientras aki nos tin miedo pa e bira un caos, particularmente den e areanan unda a institui e areanan protegi cu ta cay bao di Parke Nacional. Ta ken ta bay controla? E mesun cuerpo policial cu ta keha pa añas caba cu nan tin escasez di personal? E otro departamentonan simplemente no tin e personal pa bay cuida costa pa controla ken ta mata especie prohibi of no. Ta increible cu e consideracionnan aki ta parce di ni a pasa den mente di esnan cu ta pushando e issue aki cu tanto fervor.

Sin embargo, no ta asina cu e asunto di piscamento aki so ta hunga un papel. Mas importante ta cu e mandatario cu a bira obheto di critica, ta stroba pa den emision di e permisonan cu e tin den su cartera, corupcion na beneficio di amigo y famia sigui su curso. Aki sigur no por acusa su contrincantenan cu nan no ta transparente, loke nan kier logra ta obvio pa un gran parti di Aruba, si nos mira con publico ta reacciona riba henter e asunto aki. Awor, como cu ta trata di politico, nan ta depende di opinion di pueblo pa nan sigui. Cualkier dia, y talvez no mester warda te september 2021, lo tin eleccion. Y si nos evalua e situacion actual, ta mas cu visto cu e partido na cual e ministro critica aki tabata pertenece, no tin nada di bay busca den eleccion, cu un lider cu mester a baha pa enfrenta husticia, y sin e ‘votegetter’ mas grandi cu nan tabatin cu nan mes a saca di e partido. Pasobra ban mira e cos aki manera e ta: e actual lider di e partido no tin un futuro politico cu e actuacion cu nos a mira te awor, y esey ta conta pa e resto di e partido. Ironicamente, cada accion cu nan emprende contra nan anterior ministro, mas e ta haya perspectiva di por sobrevivi como politico, si e ta desea esey.

Y mientras tanto, Aruba, e miles sin trabao y un comercio cu a fada caba di adverti gobierno pa yega na un acuerdo cu Hulanda, ta bayendo den un incertidumbre grandi pa fin di aña, cu un cantidad desconoci di empresa cu mester tuma un decision den e tempo aki, si nan ta sigui perde placa o nan ta ‘cut their losses’ y cera negoshi, awor, no na januari. Si gobierno ta kere cu por keda hunga e wega aki di keda alarga e proceso di negociacion cu Hulanda, den e aparente speranza cu por sobrevivi financieramente te lo bin un salbacion magico, di nos no sa unda, basta nan no mester firma cu Hulanda, anto nan ta mal ekiboca. Loke lo sucede si nan ta sigui riba e caminda aki ta cu nan ta cuminza toca na interes di gran parti di e poblacion.Esey ta un escogencia politico y nan ta liber pa haci esey.Pero actuando asina ta parce cu e gabinete aki ta yegando su ‘expiration date’ si e no a pasa caba, mirando e contradiccionnan interno cu a cuminza sali.

 

LEAVE A REPLY

Please enter your comment!
Please enter your name here