Caribe Hulandes ta sigui confronta problema grandi debi na e crisis di Covid19, unda hasta Boneiro tambe tin e codigo Oranje debi na e contagio, a pesar di esfuersonan. E ta mustra cu pronto e islanan lo no ricibi turista y unabes cu habri, e nivel di turismo tampoco lo ta na e nivel di prome cu Covid. E cierre di frontera di Saba particularmente tin efecto pa e University School of Medicine cu ta importante pa economia di e isla.

Pa e motibo ey mes, Secretario di Asuntonan di Reino Raymond Knops a manda un carta pa Tweede Kamer pa splica e pakete di recuperacion y sosten pa Caribe Hulandes, unda ta mantene e liña di maneho, pa por scapa mas trabou y limita e impactonan social economico di e crisis di Covid. “E ta un tempo pisa pa e ciudadanonan y empresanan na Boneiro, St. Eustatius y Saba. No tur compania por sobrevivi y cuponan di trabou lo disparce.”

Sosten pa BES, den contexto regional segun modelo Hulandes

Hulanda a scoge pa brinda sosten na e islanan BES, na e mesun forma cu ta brinda sosten na e parti Europeo di Hulanda. Ta expande e medidanan di sosten cu 9 luna y lo yuda e organonan administrativo cu e fondonan pa cubri e perdida den entrada di belasting.

Awor ta trata di un pakete di sosten y recuperacion mas amplio, unda banda di sosten tambe tin atencion pa inversion y un maneho complementario adicional. Gabinete cada biaha tin bista riba e contexto social economico y geografico specifico di e islanan cu ta haci cu Covid19 a afecta nan economia mas pisa cu e parti Europeo. Gabinete ademas tin bista pa e diferencia den reglanan, manera belasting y siguridad social. Pero alabes, e contexto regional di e islanan ta importante.

Mescos cu studia e structura fiscal den perspectiva, compara cu e parti Europeo di Hulanda. A dicidi pa no implementa e aumentonan di belasting, incluso riba tereno, manera tabata e intencion den cuadro di e crisis di Covid. Di e forma aki, companianan riba islanan BES lo no haya nan mes cu problema di likides. “Lo sigui observa e situacion di empresarionan di cerca, pa revisa cu tempo si mester di ahustacionnan. Pero mientrastanto ta sali di punto di bista cu lo sigui brinda pakete di sosten y recuperacion den contexto Caribense, cu ta inclui stimulonan y inversionnan unda cu mester.”

Pakete di Sosten y Recuperacion Caribe Hulandes

Lo extende y eventualmente reduci e areglo temporal di subsidio pa perdida di salario y entrada, cu ta vigente desde 13 di Maart 2020. Como 650 dunado di trabou, cu 3400 trahado, ademas di 1000 independiente y como 500 cu a perde empleo por conta cu otro 9 luna di sosten. E di tres tranche pa e tres paisnan BES lo por conta cu sosten pa salario y entrada te 12 di Juli 2021. Na fin di 2020 lo mira con lo por ahusta e areglo aki, eventualmente reduci’e si economia ta permiti esaki.

Areglo di retiro

Contrario cu na momento cu a cuminsa cu e sosten, Ministerio di Asunto Interior y di Reino ta kere cu mester anticipa na realidad social economico nobo, y cu pa companianan cu tin un perspectiva insigur a pesar di sosten, nan mester haya espacio pa laga personal bay cas pa medio di retiro regular. E dunado di trabou mester demostra cu e retiro aki ta necesario.

E duracion actual di e subsidio na trahadonan retira ta mara na e virus di corona, y como tal no tin limitacion. Pa evita diferencianan, ta limita e duracion di subsidio pa esunnan cu perde trabou pa tres luna. E trahado lo mester mustra cu e tabata ricibi subsidio di salario pa motibo di Covid19, y despues di e tres lunanan, si no haya trabou, por aplica pa asistencia social. Pa esey mes, Gobierno lo pone medionan disponibel pa intensificacion temporal di mediacion laboral, pa asina e trahadonan keda cu nan habilidad, pa despues por drenta den mercado laboral sin perde nan experticionan. Lo tin medionan disponibel pa yuda trahadonan cu keda sin trabou, y kier busca otro direccion di trabou. Asina lo tin trayecto di reeducacion, siña of retene habilidadnan laboral

Como tal, e persona no por keda mas cu cuater siman pafo di e pais BES. E exigencia aki ta conta tanto pa un trahado cu ta haci uzo pa subsidio di salario, e independiente y trahado retira cu ta ricibi subsidio. Personanan no Hulandes mester demostra cu nan tabatin un permiso pa ta biba y traha na un di e tres islanan. Normalmente, un stranhero cu permiso cu perde trabou mester bolbe su pais. Pero den caso special, un stranhero cu permiso y perde trabou debi na Covid19 tambe lo por haya subsidio. Esaki ta conta particularmente pa personanan cu no por bolbe nan pais, pa motibo di limitacion di trafico aereo y no por biaha riba nan mes.

No a logra haci un evaluacion di capacidad financiero di independientenan, manera ta e caso na Hulanda mes. Lo haci esaki eventualmente, y e subsidio ta keda na 80 porciento. Gobierno di Hulanda ta keda tene cuenta cu e factor di insiguridad cu ta e desaroyo di e virus, cu ta afecta no solamente e paisnan sino nan mercadonan turistico.

Sosten na companianan

Gobierno Hulandes ta extende tambe e areglo TVL, cu ta Tegemoetkomingsregeling Vaste Lasten cu 9 luna, cu ta den liña cu locual a haci na Hulanda tambe, esta cu companianan ta haya un sosten maximo di 99 mil dollar pa tres luna.

Mescos cu na Hulanda Europeo, companianan riba islanan BES por haci peticion pa extension di pago di belasting y e interes pa cobra ta keda na 0 porciento. Hulanda lo yuda e administracionnan publico di e tres islanan cu 4.3 miyon Euro como compensacion pa perdida di entrada for di impuestonan. Tambe, lo duna sumanan pa e gastonan adicional pa motibo di Covid, pa un total di 1 miyon Euro. Lo tin medionan adicional pa entre otro eleccionnan pa Tweede Kamer na Maart 2021 y pa eleccion di conseho insular di St. Eustatius.

A informa Tweede Kamer cu ademas lo tin sosten pa aeropuerto di Boneiro, y tambe fondonan pa e sector di cultura pa tur tres isla, incluso pa e sector informativo y media. E sosten na e sector di media, pa cua tin un total di 198 mil dollar, ta pa sostene e sector di informacion di e paisnan BES.

Economia

Gobierno Hulandes ta mira e necesidad di inversion pa amplia e base economico di e islanan BES, y hunto cu e Gobiernonan di e islanan lo traha riba un mehoracion structural di e fundamento economico di Caribe Hulandes. Lo haci un inventarisacion di e proyectonan di inversion cu tin mas posibilidad di exito, cu mester ta basa riba diversificacion economico, sostenibilidad y creacion di un clima di inversion atractivo.

Tin 8 miyon Euro disponibel basa riba 50 porciento co financiamento di e departamento encarga cu maneho. Den su totalidad tin un condicion di 16 miyon Euro como cofinanciamento disponibel. Lo tuma decision riba e medionan durante e prome parti di 2021. Pero paisnan BES tambe por entrega proyectonan pa e asina yama Nationaal Groeifonds, cu ta contribui na un di e pilarnan, cu ta Research and Development, y innovacion, instrastructura y energia, y desaroyo di conocemento. E balor di e proyectonan mester ta minimalmente 30 miyon Euro.

Sosten administracion islanan BES

Hulanda lo tin fondonan pa e administracionnan di e islanan BES pa yuda cu pa pago di huur, pago di gastonan di coriente atrasa y compensacion di entrada di huur, y lo tin fondonan disponibel pa necesidadnan escolar pa tur mucha, particularmente esunnan cu ta bin di famianan cu a perde entrada debi na Covid. Tambe lo tin mas pakete di higiena pa esunnan di mas edad.

E reduccion di tarifa pa internet, coriente y awa lo keda vigente te fin di 2021.

E informacion comparti a keda palabra caba cu autoridadnan di islanan BES. Hunto lo keda monitoria e situacion y lo tuma paso unda ta necesario, esta cu ta continua of adapta e pakete di emergencia pa paisnan BES, ta locual Raymond Knops a informa Tweede Kamer.