Ayera mainta y atardi a tuma luga un reunion na parlamento unda a trata financiamento di proyecto pa renoba Horacio Oduber Hospital. Esaki ta un caso cu pa hopi tempo ta andando den parlamento. Ya caba a tene 2 reunion riba e mesun topico aki, pero e di dos reunion no a wordo caba pues awo a continua esaki bou auspicio di e parlamento nobo. Na final di e reunion un mocion a wordo trece dilanti pa fraccionnan di RED POR y MEP.

A toca diferente temanan relaciona cu e renobacion di hospital. E puntonan primordial ta cu e proyecto aki a gosa di 240 miyon caba di presupuesto di pais Aruba den pasado y awo ta pidi un suma supletorio cu ta yega te 83 miyon florin. E suma aki tambe lo percura pa e prijs di huur anualmente pa e hospital subi. Un reunion lo tuma luga durante dia di awe pa asina continua cu e mocion cu a wordo presenta na e reunion ayera.

Cua instancia mester keda responsabel

Un punto treci dilanti pa Otmar Oduber, parlamentario den fraccion di POR, ta cu den un carta anterior di parti di minister demisionario Alex Schwengle a expresa cu despues cu parlamento a pidi pa haci un investigacion riba e financiamento di e proyecto, e minister a expresa cu e no a haya contesta di parti di e conseho di bestuur di e hospital. E pregunta cu sr. Oduber tin ta cua instancia mester para resposabel pa e proyecto. Si ta trata di Stichting Onroerend Goed Aruba (SOGA), e conseho di bestuur of minister mes mester responsabilisa pa ehecucion di e proyecto.

Como contesta Sr. Schwengle a duna cu e como minister no ta responsabel pa e proyecto wordo ehecuta, pasobra e como mandatario ta responsabel solamente pa percura cu e contratonan y leynan cu a wordo stipula wordo sigui. Sinembargo e mandatario a expresa cu te hasta na Hulanda, cual ta un democracia mas bieu, tin discusionnan andando con ta anda cu responsabilisacion di ehecucion di proyectonan manera renobacion di hospital.

Sinembargo sr. Schwengle a splica cu como un di e puntonan cu Inspectie Volksgezondheid ta trata ta pa responsabilisa esnan cu ta na manda di organisacionnan importante den comunidad. Pues kinan e mandatario a splica cu e su so no por tin tur e supervision y control, e instancianan mester traha hunto pa asina wak con ta anda cu e responsabilidadnan di ehecucion di proyecto.

E opinion personal di e mandatario ta cu e raad van toezicht y/of e raad van bestuur tambe mester para responsabel. “Pero niun di e cosnan aki ta wordo regla bon den nos pais actualmente. Pero ami mes ta carga mi responsabilidad. Mi nunca no a sconde y p’esey mi ta kinan awe y mi a manda tur e cartanan cu mi a manda den pasado”.

Loophole den ley/carte blanche

Un punto cu a wordo treci dilanti durante e reunion ta e echo cu e minister di salud a haci uzo di un articulo den e ley cu a permiti’e pa haci cambionan na e plannan pa renoba e hospital sin mester haya aprobacion di parlamento. Esaki a crea un furor den sala pa un rato y parlamentarionan a bin cu diferente nomber pa e articulo aki, entre otro un loophole cu por wordo abusa y un carte blanche cu ta permiti e mandatario pa haci uzo di esaki sin discrecion.

Sinembargo e mandatario a haci un reunion cu parlamento tocante e topico aki, a base di recomendacion di departamento huridico Directie Wetgeving en Juridische Zaken (DWJZ). Sr. Oduber di POR a critica cu e mandatario no a haci esaki un reunion amplio pero a haci un reunion chikito cu 5 parlamentario, cual segun e ex minister no ta representativo di henter e parlamento.

Di parti di parlamentario di fraccion AVP y minister demisionario Benny Sevinger, e punto cardinal den e asunto aki ta cu si e parlamento no ta di acuerdo cu e uzo di e articulo di ley aki, e parlamento tin e autoridad pa por cambia esaki si asina e ta desea. “Si parlamento no ta aproba esaki e ora ey nos por cambia e ley aki den e reunion aki mes.”

Sr. Schwengle di su parti a expresa cu e mes como mandatario mester wanta su mes na e leynan. Pues e a reconoce cu el a haci uzo di esaki pero a dicidi di bay serca parlamento toch a base di conseho di DWJZ. Sinembargo e no a desmenti cu e mes ta haya e articulo di e ley aki moral. Pues e mandatario a expresa cu lo ta un bon idea pa haci e cambio aki pa asina percura cu e berdaderamente no wordo maluza.

Esaki ta un punto tambe mirando cu e proximo minister cu drenta lo mester sigui carga e proyecto aki, di mesun manera cu sr. Schwengle a sigui carga e proyecto despues cu ex minister Richard Visser a baha.

Mocion

E prome mocion cu e parlamento nobo a trece dilanti pues ta e producto di e reunion cu a tuma luga ayera. Den e mocion, cual ta bin for di fraccionnan di MEP, POR y RED, e fraccionnan ta argumenta cu despues cu parlamento a pidi e minister via un carta riba 17 di februari 2015 e minister no a duna cuenta di e renobacionnan y e placa adicional cu mester a bin acerca pa e proyecto.

E mocion tambe ta articula cu gobierno mester haci un evaluacion independiente di e contrato original y e gastonan adicional pa ehecuta e proyecto den su totalidad.