Participa den encuesta online riba opinion tocante media na Aruba

Den cuadro cu Unesco su programa di Media Pressure Cooker na Universidad di Aruba, ta pidi comunidad pa participa den un encuesta tocante opinion di media y periodismo. E resultado di e encuesta aki tambe lo forma parti di e publicacion final pa locual ta e ‘long-read’ di media y periodismo na Aruba.

Meta
Den conexion cu e “UNESCO Media Pressure Cooker”, a apunta un ekipo cu e tarea pa investiga ‘Media como plataforma pa Debate Democratico.’ E team ta consisti di diferente persona for di media, periodista, academico y otro profesional cu un preparacion diverso pero interconecta. E obhetivo di e encuesta cortico aki ta pa haya un bista di e percepcion di publico riba media na Aruba. Den e encuesta aki bo ta bay topa cu preguntanan manera: cua ta bo fuente di media/programa faborito cu ta bin na mente mesora? Cua ta e corant/nan local cu bo ta lesa mas tanto? Bo ta generalmente confia media di Aruba y cua ta e motibonan pakico bo ta confia y depende riba e fuente di medianan specifico aki?

Participacion
Cada persona tin derecho pa no participa den e encuesta of stop di duna contesta, sin ningun consecuencia. Pa participa, click riba e link aki: Encuesta na Papiamento of tambe tin Encuesta na Ingles. Na fin di cada pagina por mira un boton cu ta bisa ‘continua’ pa asina por sigui pa e otro preguntanan. Si tin pregunta cu ta prefera pa no contesta, djis primi riba ‘continua’. E encuesta aki no ta tuma mas cu cinco minuut di tempo di cada persona. E ta importante pa contesta e preguntanan honestamente, no tin ningun contesta robes of corecto. Cada contesta lo keda trata di forma confidencial y den tur anonimato.

Resultado y presentacion
Si bo ta interesa den un compilacion di e resultadonan, nos ta invita bo pa e presentacion di e Media Pressure Cooker di UNESCO, dia 15 di February. Consulta www.facebook.com/mdparuba pa mas informacion riba e evento. Un publicacion largo ( ‘long read’) cu ta contene tur resultado di investigacionnan riba e tema di Media lo keda lansa e dia ey tambe. Actualmente e grupo di participante ta hincando tur material den otro pa e publicacion aki. E trabou aki ta encera entre otro e coleccion di informacion analitico riba media y periodismo na Aruba, como tambe presentacionnan di video y diferente estadistica.