Desde 1986 Aruba a wordo goberna door di partidonan politico tradicional cu a causa cu nos tin un aparato gubermental gigantesco, un debe astronomico y ni 1 Florin gespaar den e caha di pueblo. Cada biaha cu un gobierno nobo sinta nan ta sigui aumenta e cantidad di empleado publico y debe manera no tin mañan y ta parce cu tin un competencia ta ken por gasta mas placa.

Especialmente entre 2001 pa 2009 y 2009 pa 2017 na unda respectivamente partido MEP y partido AVP a haya e mayoria absoluto pa goberna y a redobla e debe durante nan periodo di gobernacion. Tambe nan a sigui yena e aparato gubermental durante nan periodo di gobernacion apesar cu a privatisa varios departementonan y cu a introduci varios areglo di VUT cu mester a baha e cantidad di empleadonan publico.

E desaroyo aki a sigui atrobe na 2017 pa awor y nos por constata cu e gobierno actual cu ta consisti di un coalicion a kibra tur record y pa fin di juni 2021 ja caba e debe a subi cu casi 2 Biyon Florin. Ora nos sinta analisa ta dicon e debenan aki a bay for di man nos por yega na e conclusion cu mal maneho, corupcion y patronahe politico ta e causantenan principal.

Awor e gobierno actual ta purba di hustifica cu ta pa motibo di covid 19 nos ta den e situacion financiero pesimo. Pero en realidad esaki no ta e caso pasobra tur loke e covid 19 a haci ta expone e debilidad financiero y economico di Aruba causa desde 1986 pa gobiernonan di partidonan tradicional.

No a percura di traha un dam pa warda awa aden. Si un dam a wordo construi desde 1986 pa warda awa aden awe nos lo ta mehor para y por a wanta cualkier golp Por a evita e ora ey COHO y landspakket y mantene nos autonomia. Awe Aruba ta financieramente, economicamente, socialmente, politicamente y constitucionalmente na werki danki na e politica tradicional desde 1986 di mal maneho, corupcion y patronahe politico.

E uniconan cu a probecha y progresa desde 1986 ta e politiconan y nan famia, amigonan, campanadornan y sponsernan kitando asina e oportunidad igual di e pueblo pa progresa y aporta na e potencial di Aruba. Esaki ta un crimen di marka mayor contra e pueblo. Si nos sigui den un sistema tradicional di mal maneho, corupcion y patronahe politico Aruba hamas lo sali for di e abismo. E mes un partidonan tradicional cu a hinca nos unda nos ta awe kier pretende di bai reconstrui Aruba.

Ta con nan por reconstrui Aruba ariba un fundeshi cu nan a laga na werki? Ariba un fundeshi na werki bo no por renova of construi un cas. E causantenan d nos problemanan hamas por ta e solucion pa nos problemanan y no por ta esnan encarga pa construi nos cas Aruba den e tempo dificil aki. Na prome lugar e ta sumamente importante pa e pueblo votador di Aruba vota pa un fundeshi politico nobo sin participacion di e partidonan y politiconan tradicional di MEP, AVP, POR, RED, 3 PPA, UPP, MAS y cualkier otro partido politico nobo cu tin pensamentonan politico tradicional.

Solamente asina por garantisa cu e construccion di un Aruba nobo lo ta exitoso. Solamente si nos basha un fundeshi politico nobo nos por transforma Aruba na e bienestar di e ciudadanonan y no na e bienestar di e politiconan y nan famia, amigonan y sponsernan. Nos tin di laga e pasado atras pa nos por cuminsa cu un futuro nobo door di rechasa masalmente e partidonan tradicional door di no vota pa nan den e proximo eleccion.

Esey mester ta e prome paso cu mester wordo tuma pa tin exito. Aruba su existencia ta depende di esaki. Den e programa aki nos lo duna nos vision y pensamentonan con nos kier transforma Aruba na e bienestar di e ciudadanonan y no e bienestar di e politiconan y nan compinchinan. Den e transformacion pa un Aruba nobo nos tur ta haya e oportunidad igual, conforme bo abilidad y talento, pa progresa ariba tur nivel di bida. Solamente asina Aruba por yega su maximo potencial y wordo transforma den un nacion ehemplar, respetuoso y fuerte.

Den e programa aki nos lo pone nos enfasis ariba 3 puntonan crucial menciona den capitulo 2 cu mester wordo implementa ariba nivel politico pa e transformacion ta na beneficio di e ciudadanonan y pa futuro maneho ta exitoso. E motibo ta cu COHO y landspakket, firma pa e gobierno aki, ta limita e maneho cu bo por stipula.

Pero e bon noticia ta cu partido CURPA como unico partido politico a premira e situacion cu Aruba ta aden awe y na 2017 nos a prepara pa esaki cu nos programa “Salba Aruba.” Den e programa ultimo aki nos a presenta manehonan duradero pa soluciona structuralmente varios problemanan pa asina prepera Aruba pa cualkier reto nos dilanti.

Hulanda den e landspakket a menciona hopi solucion cu nos a pone den nos ultimo programa. Esaki ta un muestra di e calidad di nos programa. Nos ta diferencia cu e landspakket di Hulanda ariba entre otro medidanan, kitamento di empleadonan publico, subimento di edad di pensioen y importacion di mas trahado stranhero. Esakinan no lo resolve e problemanan pero lo haci nan peor. Den nos ultimo programa nos a bisa cu no mester di medida, no mester kita empleadonan publico, no mester importa mas trahado stranhero y tampoco mester subi edad di pensioen contrario nos lo a baha esaki.

Nos ta keda cu e punto di bista aki pasobra nos tin solucionnan creativo pa soluciona e problemanan. Pa logra transforma Aruba exitosamente na e bienestar di Aruba y e ciudadano ta sumamente importante cu e 3 areanan menciona den capitulo 2 wordo realisa. Si esakinan no wordo realisa e pueblo y Aruba hamas lo progresa y tur maneho lo ta envano, cu of sin ayudo di Hulanda.