PayPal a retira for di e proyecto di criptomoneda di Facebook, conoci como Libra, den un golpi pa e compania di red social cu a enfrenta escrutinio mas fuerte cu a pensa tocante su propuesta pa crea un sistema di pago alternativo.
E compania di pago digital a bisa diabierna cu ta retirando for di Libra Association pa asina por enfoca riba negoshinan existente. “Facebook pa largo ta un partner strategico y valioso di PayPal, y nos lo sigui como partner y sigui duna sosten na Facebook den varios capacidad”, PayPal a bisa.
Facebook a presenta Libra como un moneda cu por ser uza pa pagonan digital, particularmente fuera di Merca. E lo conta cu sosten di placa berdadero, a diferencia di otro moneda digital manera Bitcoin of Etherium.
Libra Association, basa na Suisa, tabata supone di duna e proyecto di criptomoneda un distancia confortabel for di Facebook, cual no lo ta doño di Libra.
A pesar di esfuersonan di Facebook, reguladonan financiero como tambe miembronan di Congreso a cuestiona e motibonan di e compania pa crea un criptomoneda nobo, particularmente den contexto di e critica cu e business model di Facebook ta demasiado invasivo di e privacidad di su usuarionan.
Congresista Maxine Walters, presidente di House Financial Services Committee di Congreso, a exigi fundado di Facebook, Mark Zuckerberg testigua dilanti di su comite prome cu Libra ser lansa. Banda di preocupacion pa cu privacidad, Waters a cita e potencial pa Libra ser uza pa labamento di placa y otro crimen financiero.
Republicano y democratanan, y hasta presidente Donald Trump a pidi pa Facebook wordo someti na leynan bancario Mericano – un prospecto arduo y complica – si e compania di red social bay dilanti cu e proyecto di Libra. Como contesta, Facebook a contrata cantidad di ‘lobbyist’ prominente di Washington pa convence politiconan pa duna nan aprobacion pa Libra.
PayPal Holdings Inc., cual ta basa na San Jose, California, ta e prome compania pa publicamente termina su asociacion cu Libra, pero segun reportenan, otro companianan tambe ta dudando. The Wall Street Journal e siman aki a reporta cu Mastercard y Visa, e proveedonan di pago mas grandi di mundo, tabata dudando riba nan relacion cu Libra.
Libra Association a bisa cu tin plan pa sigui bay dilanti cu e proyecto, sin PayPal.
“Construyendo (Libra) ta un biahe, no un destino… cada organisacion cu a cuminsa e biahe aki lo mester haci su propio evaluacion di riesgo y beneficio di ta comprometi pa pasa e cambio cu Libra ta priminti”, segun Dante Disparte, cabesante di politica y comunicacion pa Libra Association.
