PDVSA: Produccion di crudo 2017 na nivel 1993

E empresa petrolero estatal Venezolano PDVSA ta calcula cu su produccion di crudo na 2017 lo keda cerca di e nivel minimo di 23 aña pasa, segun un documento interno, cu agencia Reuters a haya pa mira. Esaki lo ta sugeri mas dificultad ainda pa e pais aki, cu ya ta hundi den un crisis profundo, segun e articulo di Reuters, elabora pa Alexandra Ulmer y Brian Ellsworth.

PDVSA, cu ta provee casi e total di entrada na divisa pa Venezuela y cu ta motor financiero di e gobierno socialista, ya a registra un caida di su produccion di casi 10% na 2016, empeora pa e colapso di e prijs internacional di crudo. E situacion financiero debil di e empresa ta causando interupcion operacional y ta contribuyendo na un recesion economica sin precedente den e pais. Pa 2017, PDVSA ta anticpa un produccion di 2,5 miyon bari pa dia (bpd), un aumento di apenas 5.000 bpd compara cu e 2,49 miyon bpd di e prome 11 luna di 2016. Esaki segun e plan strategico di nuebe aña presenta na december ultimo. Por compara e nivel di produccion aki cu esun di 1993, mientras cu PDVSA tambe ta haciendo un esfuerso pa paga su proveedornan di servicio, di cual algun ya a para nan servicionan.

E documento di 261 pagina cu Reuters a mira, ta duna un acceso inusual na e plannan di PDVSA, cu ta custumbra di mantene su informacion secreto y poco biaha ta publica detaye di su negoshi. Di acuerdo cu e informe, e compania ta anticipa un deficit den importacion di diluyente necesario pa e mescla di crudo extra pisa, como tambe plannan agresivo di mantenimento den refineria. PDVSA no a responde riba un mail manda pa Reuters solicitando comentario riba e reporte interno. E envionan di petroleo pa su aliado China, cu a presta Venezuela mas di 50.000 miyon dollar atraves di un acuerdo, den cual e pais ta paga cu crudo, lo aumenta cu 55% e aña aki te yega na 550.000 bpd, segun e informe. E compania no a splica e aumento, pero esaki por indica e final di un periodo di gracia cu Caracas a negocia cu China, loke a permiti reduci e envionan te 355.000 bpd na 2016, di e 627.000 bpd di aña 2015. Sin embargo, ta anticipa cu e envionan di petroleo pa India lo cay cu 15,5% te 360.000 bpd. Diferente cu China, India ta paga principalmente den efectivo, loke lo significa un situacion empeora pa finanzas di Venezuela. Importacion minimo, mantenimento largo PDVSA tambe ta proyecta un importante deficit di crudo liviano y nafta, crucial pa converti su crudo extra-pisa di e Faha di Orinoco den un petroleo mas lihe, apto pa exportacion.

Venezuela a inicia importacion regular di diluyente na 2015 debi na caida di su produccion di crudo liviano y mediano, pero escasez di efectivo di PDVSA a provoca tardansa y compra insuficiente. Den e puertonan fila extenso di tanker ta forma cu ta warda pago pa nan descarga, segun dato di Thomson Reuters, y fuente di e industria aki. E aña aki, PDVSA tin planea pa importa 125.000 bpd di crudo liviano, pero ainda lo enfrenta un deficit di 217.000 bpd, segun e documento. Tambe lo enfrenta un escasez di 28.000 bpd di nafta, usa pa dilui e petroleo di Orinoco. PDVSA a informa cu ta spera di compensa parcialmente su deficit di diluyente a mediano plazo cu e mantenimento di su refinerianan pa na por produci mas nafta. Ademas, tin planea pa reactiva un refineria na Aruba, opera pa su filial Citgo. Pero e proyectonan di PDVSA regularmente tin retraso, asina cu ta poco probable cu e refineria di Aruba lo ta operativo a corto plazo. Ademas, e plantanan na Venezuela ta sufri un plaga di interupcion y apagon. E plan di mantenimento di circuito refinador pa e aña, describi den e documento ta mustra cu PDVSA ta planea pa para algun unidad domestico crucial durante 90 dia, aproximadamente doble di e standard di e industria pa programa di mantenimento mas importante.

Esaki ta sugeri cu PDVSA lo ta tratando di probecha un produccion stanca pa reacondiciona su red di refinacion. E refinerianan na Venezuela y Curaçao na 2016 a ricibi 200.000 bpd menos na entrega di crudo cu e aña anterior, e documento ta bisa, segun e relato aki di Reuters.

You May Also Like

256aa2b372c7b39e63cbba0489adb274c785704f773fa876935d08b54591b102_3775986.jpg

Sospechoso mester a recrea asesinato di polis

Un homber Ingles y su casa Australiano a wordo acusa di a mata un ...

Morto di hoben adicto riba internet na China ta causa furia

Un hoben Chines a fayece algun dia despues cu el a wordo manda na ...

Miyones di Australiano a vota pa matrimonio di mesun sexo

Australianonan a vota na fabor di legalisacion di matrimonio di mesun sexo, y na ...

image.jpg

Busceda intenso pa un pashent cu a scapa di hospital psikiatrico

Na Washington State, ta buscando un homber cu a scapa for di un hospital ...

Ex vice ministro di Alvaro Uribe a admiti culpa den caso Odebrecht

Ex vice-ministro Colombiano di Transporte Gabriel García Morales a admiti dilanti di autoridadnan di ...