Consul resultado eleccion peru (2).jpg

Ayera e candidato Peruano, Pedro Pablo Kuchinzqui, di PPK”(Partido Peruano por el Kambio), tabata e virtual ganado di eleccion presidencia di diadomingo ultimo. E margen entre PPK y su rival politico, Keiko Fujimori di partido Fuerza Popular ta masha estrecho.

Ayera tardi di acuerdo cu e resultadonan di ONPE (Oficina Nacional di Proceso Electoral), Pedro Pablo Kuczynski ta e virtual presidente di Peru cu un 50,32% di e votonan, superando cu apenas un 0.6% na Keiko Fujimori, kende a logra alrededor di un 49,68%. Aunke ta wordo pronostica cu e diferencia entre e dos candidatonan aki lo ta entre 3% pa 5%

Bon Dia Aruba a entrevista e Consul di Peru na Aruba, sra. Giovana Tapia tocante e resultado di e eleccion aki y su desaroyo na Aruba. E diplomatico a bisa cu ainda ONPE ta wardando riba e acta di e votacion den exterior y tambe di algun pueblonan, pero nan no lo haci mayor diferencia ya cu oficialmente PPK a logra un tiki mas cu un 50% di e votonan caba. “Keiko no lo por logra mas cu esey, ya cu e ora nos lo ta papiando di mas cu un shen porciento”, el a bisa.

E diplomatico a bisa cu director di ONPE a pronuncia su mes bisando  cu e organo aki ta considera PPK como e ganado di eleccion na Peru.

Eleccion Peruano na Aruba

Encuanto e celebracion di eleccion di Peru na Aruba, sra. Tapia a declara cu tur cos a bay bon. Un total di 667 Peruano ta aparece den nan censo electoral pa vota na Aruba. Di nan den e prome buelta di un luna y mei pasa a vota 374 Peruano; y den e di dos buelta y definitivo di diadomingo ultimo a vota 370 Peruano.  El a bisa cu despues di 4’or atardi cu oficialmente e eleccion ta cera a yega un grupo di mas cu 10 persona cu intencion di bay vota. Pero e diplomatico a bisa cu e instruccion cu nan tin ta cu te 4’or atardi e votacion ta tuma luga.

E resultado di e eleccion aki na Aruba a wordo informa inmediatamente na ONPE. Mientras cu e actanan di votacion e funcionario di Embahada di Peru na Caracas, sra. Rebeca Marquina a bay cun’e. Ayera mes e material electoral aki hunto cu esun di Venezuela, a wordo manda pa Peru. 

Consul di Peru na Aruba, sra. Giovana Tapia a gradici gobierno di Aruba cu a permiti pa e ciudadano Peruano por eherce nan derecho civico di voto riba nos isla cu absoluto trankilidad y siguridad.  E diplomatico a bisa cu nan a yega di manda un carta na departamento di Relacion Exterior pa nan pone nos autoridadnan competente riba e celebracion di e eleccion presidencial aki.

LEAVE A REPLY

Please enter your comment!
Please enter your name here