editorial 2_15_1.jpg

Na momento cu e crisis politico y economico na Venezuela ta yegando su punto culminante, nos gobierno ta ricibi  bishita di un delegacion comercial di e pais aki pa estrecha laso economico. Pakico net na e momento aki, ora un collapse di e sistema di abastecemento ta inminente y autoridadnan tin mas y mas problema pa mantene orden publico? Unda no tin cuminda den supermercado mas y gobierno socialista a pasa na interveni den e sistema di distribucion, confiscando cuminda y repartiendo esaki via e comitenan di bario di partido den gobierno PSUV, conoci como “Comités Locales de Abastecimiento y Producción” (CLAP). Tin denuncia cu ta desvia alimento for di e sistema comercial regular pa faborece abastecemento via e canalnan di partido. E reparticion den e barionan di pakete di alimento ta tuma luga via registracion, esun cu no registra no ta haya alimento. Ta dificil pa haya ehemplo comparabel di politizacion di economia pa un ilusion socialista/comunista.  

Esaki no ta ilustra solamente e grado di abuso na cual e regimen a yega, sino tambe e grado di desesperacion di tanto gobierno como poblacion, cu prome tabata para oranan largo den rij pa haya algo, y  awor ta para oranan den rij pa haya nada. Ya tabatin varios incidente unda militarnan ta interveni na supermercado confiscando alimento y hibando esaki pa destino desconoci. Tabatin tambe varios incidente di ciudadano cu ta tuma ley den nan mes man y ta asalta y sakea diferente tienda.

Den e situacion explosivo aki gobierno ta haya ta bon pa tene un evento cu ministro di Comercio di Venezuela, pa sondea e posibilidadnan cu e pais aki. Y kico realmente ta e perspectivanan? Venezuela tin algo di ofrece na e momento aki? Ora henter e aparato productivo a dal para y hasta ta para produccion di cerbes pa falta di materia prima, ta para produccion di Coca Cola pa falta di sucu, companianan di aviacion (Aeromexico, Lufthansa) ta para nan vuelonan pa e pais pasobra nan no por saca divisa for di e pais, ora cu practicamente no tin ningun exportacion banda di petroleo y producto petrolero, esey ta e momento pa busca laso economico? Manera nos ta comprende, e delegacion Venezolano ta busca inversionista pa hiba divisa nan pais. Esey di nan banda mira tin sentido, ya cu e caida di prijs mundial di petroleo a laga e pais su entrada na divisa practicamente na mita di loke e tabata y nan ta desespera pa aumenta entrada di divisa. Pero ta ken ‘in his right mind’ ta bay hiba dollar Venezuela awor, mientras cu tur hende conoce e situacion di expropiacion na grandi cu a tuma lugar cu un cantidad di empresa di capital stranhero? Ken ta bay inverti den un pais unda bo no por exporta ganashi y tin un situacion di insiguridad alarmante? Kico anto pa gobierno di Aruba por ta e beneficio pa organisa evento hunto cu delegacion di e pais den crisis aki?

E motibo ta cu gobierno mester di e tipo di show aki pa aparenta cu tin ‘algo’ na nivel oficial ta sucede encuanto e refineria. Cu esey por gaña esnan menos informa, pero no esnan cu ta sigui noticia internacional tur dia. Lo no tabata logico si gobierno Venezolano, y PDVSA, na e momento di e acuerdo aki lo a sali grita ‘aleluya’ pa e deal cu Citgo/PDVSA, si en berdad esaki ta bay yuda economia di Venezuela tanto den su desesperacion pa aumenta produccion? Despues di 13 di mei cu gobierno di Aruba a anuncia e ‘deal’ cu Citgo, ni di Citgo mes no a bin un comentario positivo…

Imagina bo cu  un compania registra na bolsa na Merca, ta bay den un deal biyonario anto nan no ta saca ni un noticia di dos regla riba nan website! Henter e asunto ta cu ta gobierno di Aruba mester di un escenario pa laga nos sigui kere den e proyecto di refineria. Den casi un luna di tempo ningun di esnan envolvi a bisa un palabra riba e acuerdo, ni Citgo, ni PDVSA, ni gobierno di Venezuela, ni Valero, cu por a canta gloria pasobra nan lo a libra di tur responsabilidad ambiental di e propiedad. Te cu e fin di siman aki por fin un ministro Venezolano a bin aki anto den prensa ta sali cu ‘nan di cu e di’ cu e acuerdo cu Citgo ta importante…

Ademas, ta ken a bisa cu esaki ta e ministro responsabel pa e asunto aki, ya cu Venezuela conoce un ‘Ministro del Poder Popular de Energía y Petróleo’. Di su banda te dia di awe no a sali ni un solo palabra tocante e asunto aki, tampoco di presidente Maduro, cu no ta perde un oportunidad pa gaba cu cualkier logro. Y esaki lo tabata un grandi, pasobra e por bisa cu memey di e crisis di credibilidad actual, e ta haya aliado cu ta parti di Reino Hulandes. Anto e no a probecha? Gobierno di Aruba tambe mester ta desespera pa ta colga na rabo di Venezuela. 

LEAVE A REPLY

Please enter your comment!
Please enter your name here