(AP) – Persephone ta un guia turistico na Grecia, pero no manera hopi hende ta custuma di wak.

Categorisa como e mundo su prome guia turistico robotico den un cueva, Persephone tin desde mita di juli ta duna turistanan y bishitantenan un bon bini na e Alistrati Cave den e parti noord di Grecia, 135 kilometer leu di e ciudad di Thessaloniki.

E robot multilingual aki ta cubri e prome 150 meter di e cueba cual ta habri pa e publico. Den e resto di e cueba, cual ta 750 meter, un guia turistico humano ta sigui cu e tour.

Su nomber, Persephone, ta bin pa causa cu segun un di e versionnan antiguo di e mitologia Griego, e ta den un area cercano di e cueba unda cu Pluto, e Dios di e sub-mundo ken tambe tabata conoci pa e nomber Hades, a secuestra Persephone cu permiso di su tata Zeus, pa tuma su persona como su casa.

E robot por duna su parti di e tour den 33 lenguahe y interactua na un nivel basico cu e bishitantenan den 3 lenguahe. Tambe e por contesta 33 pregunta pero solamente den Griego.

Nikos Kartalis, e director cientifico di e Alistrati tabatin e idea di crea e robot ora cu el a mira uno riba television guiando hende den un galeria di arte. 17 aña despues, “nos a ricibi fondo y e robot di guia turistico a bira un realidad,” Kartalis a conta The Associated Press.

Persephone a ser construi pa e National Technology and Research Foundation y a costa 118,000 euro.

“Ya caba nos a mira un aumento di 70% di bishitante compara cu aña pasa desde cu nos a cuminsa usa e robot,” Kartalis a revela. “Hendenan ta emociona, specialmente e muchanan, y hendenan cu a bishita nos caba den pasado ta bolbiendo bek pa por conoce y experiencia e robot.”

E robot sa con y unda pa move den e paisahe di e cueba. E formacionnan varia den e paisahe por yega un haltura di hasta 15 meter, y por ser mira den henter e cueba su largua di 1 kilometer, cual ta accesibel pa hendenan cu limitacion pa cu mobilidad.

“E cueba aki ta un di esunnan mas bunita, no solamente den Grecia pero den Europa tambe,” Kartalis a conta. “E tin diferente colornan y formanan cu ta hopi unico y diferente.”

Persephone, cu un curpa blanco y cabes preto y dos wowo luminoso ta move riba di wiel, guiando e turistanan y bishitante nan pa na e prome 3 di e stopnan den e cueba. E por haci 2 stop adicional, pero su velocidad abao ta haci cu e tour lo dura hopi mas largo, cual ta ser conduci den 3 lenguahe na mesun momento. Persephone su creadornan ta deliberando y buscando maneranan di por subi su velocidad.

E robot ta cuminsa e tour introduciendo su mes bisando “Mi nomber ta Persephone. Mi ta e yiu di e Diosa Demeter, y casa di Pluto, e Dios di e sub-mundo. Mi ta duna boso tur un bon bini na mi reino bao di tera, e cueba Alistrati.”

Persephone no ta e unico tecnologia usa den e cueba. Tin un aplicacion cu por descarga den bo celular, den cual un bishitante, por scan un QR code, y por wak Alistrati Beroni. E ta un microorganismo cu ta ser haya solamente den e cueba aki, den tur loke e vleermuisnan a laga atras ora cu e cueba a ser habri, y e vleermuisnan a migra bay otro caminda.

Evdokia Karafera ta un di e guianan turistico cu ta traha hunto cu e robot.

Karafera ta conta cu e “ta un yudansa grandi pa motibo cu e ta papia diferente lenguahe, solamente cu un atras chikito den e tour.” “Mayoria hende ta haya Persephone fascinante, specialmente e muchanan, y ta nan ta haya hopi interesante cu e por papia asina hopi diferente idioma.”

Karafera a insisti, cu aunke Persephone ta un gran ayudo, e guianan turistico humano nunca lo por ser reemplasa.

“Robot, den un cierto punto den futuro, lo reemplasa hopi di nos den trabaonan. Pero mi ta kere cu nan no por reemplasa humanonan tur caminda,” Karafera a bisa. “E bishitantenan sa expresa cu ‘e robot ta interesante y original, pero e no por substitui e contacto humano cu por experiencia cu e guianan, y e conversacion cu por teni ora di cana bay bek entrada.”

 

LEAVE A REPLY

Please enter your comment!
Please enter your name here