Siman pasa a haci denuncia ora cu un a ricibi un menasa di tiramento na Colegio Arubano. Relaciona cu esaki, rector di Colegio Arubano a manda un carta unda ta informa tocante investigacion cu ta tumando luga y cu tur cos lo ta segun agenda.
A comunica cu vocero di cuerpo policial, Lito Lacle kende a confirma cu a detene e persona sospechoso di e menasa aki. Investigacion ainda ta tumando luga, caminda no por a duna mucho informacion.
Pa locual ta trata Colegio Arubano mes, a sigui cu nan orario di tur CP y SE segun e rooster. A bisa cu lo tin extra vigilancia pa e dianan binidero na e scol, y lo controla tur tas y tur persona cu drenta den e tereno di scol.
Den e mesun carta e rector M. Van Loon a menciona cu ta pidi pa persona no drenta den panico y asina cu investigacion termina nan lo informa comunidad debidamente.
