(France24) – E demanda a ser presenta na husgado civil number 27 di Lima contra seis empresa: Repsol (Spaña), Mapfre Global Risks (Spaña), Mapfre Perú Compania di Seguro y Reaseguros (Perú), Refinería La Pampilla (Perú), Transtotal Agencia Marítima (Perú) y Fratelli d´amico Armatori (Italia, esun cu a arma e barco tanker involucra), segun e agencia Peruano a detaya.

“E accionnan aki por genera un hurisprudencia den temanan di derame di petroleo cu ta produci dañonan colectivo pa contaminacion di medio ambiente na zona ribereño”, Julian Palacin, director ehecutivo di Instituto Nacional di Defensa di Competencia y Proteccion di Propiedad Intelectual (Indecopi), a publica den un comunicado diabierna di siman pasa.

E derame a tuma luga dia 15 di januari ultimo, mientras e barco tanker “Mare Doricum”, di bandera Italiano, tabata descarga crudo na e refineria La Pampilla na Ventanilla, 30 kilometer nort di Lima, propiedad di Repsol.

E compania petrolero a atribui e accidente na e olanan causa pa erupcion di e volcan na isla di Tonga, otro banda di ocean Pacifico, y gobierno Peruano a califik’e como un “desaster ecologico”.

E derame di crudo di Repsol a afecta mas di 700.000 habitante, piscadonan den nan mayoria, y a obliga e ciere di mas di binti beach y negoshinan di e zona.

Indecopi ta reclama 3.000 miyon dollar pa dañonan ambiental y 1.500 miyon pa daño moral na e consumidor, usuario y otro personanan afecta, segun e demanda.

E mancha di crudo a plama den e awa y costanan te hasta 140 kilometer nort di e refineria, loke a provoca e morto di un cantidad no determina di pisca, parha y otro bestianan marino. Servicio Nacional di Area Natural Protegi a haya 539 parha y dos lobo marino morto hasta dia 11 di april ultimo.

 

LEAVE A REPLY

Please enter your comment!
Please enter your name here