plachi auto.JPG

Durante e temporada cu e plachi di number di auto nobo a caba, e situacion aki a crea cierto molester cerca polis, ya cu nan no por a realisa un bon control, debi cu e automobilistanan a haya un carta fei Servicio di Impuesto Aruba (SIA) caminda nan por core cu un plachi di number provisional traha pa nan mes. Pero tabatin hende cu a yega traha esun di dje nechi y visibel pa polis, pero otro nan  no. 

Sra. Meverlin Romano kende ta vocero di SIA  a declara na Bon Dia Aruba cu nan no a traha tempran mas plachi ya cu e departamento aki tabata na expectativa di kico lo por a pasa cu 2016. Te cu october pasa  gobierno tabatin intencion di hinca e belasting den e prijs di gasolin.

Despues mas na final di aña  a bin e decision cu e sistema aki no ta bay door mas, y finalmente a cay e decision di parti di gobierno cu nos lo keda mantene e plachinan di 2015, y e clientenan lo sigui uza nan durante 2016, ya cu lo  bin cu e sistema di sticker. E aña aki ta uno hopi particular –segun sra. Romano- ya cu prome biaha no tin un plachi di number nobo pa aña 2016, manera nan yega di anuncia na december, cu excepcion di e motociclistanan.

Plachi nobo

Sra. Romano a bisa na e matutino aki cu na e momento ey nan a haci e pedido di e plachinan di reserva hunto cu e plachinan di motociclistanan. Na december SIA no tabatin e plachinan ey ainda ya cu nan ta wordo traha afo y nan ta tuma tempo pa ricibi nan, pero finalmente  nan  caba di yega. 

El a bisa cu dos siman pasa e barco a yega Aruba, pero a tuma un par di dia prome cu nan a ricibi e plachinan  y pa nan realisa e debido control pa wak si tur e plachinan t’ey y ordena nan riba reki.  E a bin ayera cu e bon noticia cu entrante e siman nan clientenan lo por pasa busca nan plachi.

Esun cu ta coriendo cu un plachi di  carton aworaki libremente nan por pasa na departamento di Impuesto  pa busca nan plachi nobo, asina sra. Romano a informa ayera.

Banda di e numbernan cu nan a duna caba, caminda nan clientenan nobo lo por bay busca esey, nan tin un cantidad di alrededor di mil plachi di reserva pa e clientenan nobo cu ta bay acudi durante aña cerca SIA. 

Sra.  Romano a informa cu te cu e number 64000 nan a manda traha plachi nobo, y ya caba nan ta riba e number 63.260 bendi. Kiermen nan tin 800 plachi  reserva pa nan cliente nobo durante 2016. 

LEAVE A REPLY

Please enter your comment!
Please enter your name here