Maneho Salubridad Publico

Como strategia pa e periodo di gobernacion 2021-2025, ministro di Salud Publico ta pone, segun strategia gubernamental general, e pacient central. E pandemia ocasiona pa Covid-19 a demostra no solamente Aruba, sino mundo henter con vulnerable y importante salud di hende ta.

Un comunidad saludable ta aporta na productividad y desaroyo di un pais, pero tambe na calidad di bida di ciudadano.

Tambe ta expresa cu e pandemia a demostra con vulnerable Aruba ta, enfocando solamente riba e pilar turistico como base economico. Durante e pandemia innovacion y creatividad a hunga un rol importante. Sector di turismo y salud publico haciendo uso di innovacion y creatividad a duna oportunidad na Aruba pa por habri su fronteranan den un tempo corto sigurando e turista viahero, durante e pandemia, cu Aruba tin e virus bao control mediante testing y control di higiena.

Pa e motibo aki diferente proyecto di diversificacion di economia riba tereno medicinal a inicia y lo sigui desaroya durante e gobernacion actual. Den e cuadro aki lo amplia tambe posibilidadnan pa turismo medico y lo capacita Bureau Cannabis, tambe pa soluciona e problematica relaciona cu industria di cannabis.

Vision y mision

Vision di ministro di Salud Publico ta pa crea un comunidad saludable, cu ta tuma responsabilidad pa su propio salud, sigurando acceso na cuido medico general di calidad halto, basa riba igualdad. E mision ta pa na aña 2030 Aruba logra un sistema di cuido di calidad halto, cu enfoque special riba un bida saludable, duradero y sostenible. Ta basa esaki riba e siguiente principionan:
1. Igualdad;
2. Enfoque riba salud pa bida largo;
3. Empodera comunidad;
4. Respet pa derechonan humano;
5. Promove programanan di salud cu ta “evidence-based”;
6. Colaboracion multisectoral;
7. Integridad.

Maneho ministerial ta basa riba cuatro tereno strategico:

1. Implementa “Liderazgo y Bon Gobernacion” den contexto di “Universal Accesss to Health

(UACH)” y “Universal Health Coverage (UHC)”.

2. Promove y incorpora mas coordinacion y colaboracion multisectoral den sistema di cuido pa sigura ciudadano (pacient) acceso na cuido di calidad halto.

3. Inverti den competencia di profesionalnan den cuido pa garantisa calidad halto den cuido.

4. Restructura mecanismonan di financiamento pa realisa y mantene un sistema duradero di cuido na forma razonable.

Aña 2021

Control di costonan den sector di cuido general: lo inicia y implementa mecanismonan pa mantene costo den cuido sostenible, cu un proyecto hunto cu Departamento di Salud Publico, Caribbean Medlab, pa eleva eficiencia den servicionan di laboratorio. Tambe stimula colaboracion di cuido hospitalario den region; y continua cu mitiga costo di cuido den exterior por medio di destaho y colaboracion alternativo den region (Costa Rica, Colombia, USA). Den organisacion di cuido, lo implementa y controla AruBIG, y activa un Instituto di Calidad, ademas di inicia registarcio di dato relaciona cu Enfermedad no Contagioso (NCD) pa mas control y prevencion di enfermedadnan cronico. Lo formalisa reorganisacion di Departamento di Salud Publicoy lo traha riba conscientisacion y prevencion. Lo amplia e Aruba Health App pa colecta dato relaciona cu prevencion di NCD. Alavez plan pa amplia educacion specialisa di enfermeria.

Na 2022, banda di continuacion di proyectonan di 2021, lo traha riba un Plan Nacional di Cuido combina cu un Manpowerplanning.

Tambe lo amplia casnan di cuido pa atende e problematica di “verkeerde bedden” na hospital cu atencion special pa adultonan mayor.

Lo revisa y implementa un serie di ley, entre otro ley riba limitacion di producto di tabaco, ley encuanto casnan di cuido.
Lo inicia Instituto di Calidad como departamento y investiga posibilidadnan pa independisaVeterinaire Dienst.

Lo inicia un campaña intensivo pa cu prevencion y apertura di un “obesitas kliniek”. Tambe un campaña dirigi na Scol Saludabel pa señala problemanan di salud cerca mucha y hoben. Control di costonan den cuido medico general lo keda concretisa den implementacion di “zorgheffing” y fondonan pa atende costo den cuido di emergencia.

Aña 2023

Lo contimua cu plannan di añanan anterior, entre otro pa loke ta legislacion, y control riba implementacion di ley. Tambe lo pasa pa establece e Instituto di Calidad. Lo institui mas trabao di equipo y institutonan multidisciplinario, entre otro fusion entre e hospitalnan local. Tambe proyecto di conscientisacion y prevencion y imposicion di derecho di pacient. Tambe lo reevalua e paquete di seguro medico general por medio di e investigacion cu ta parti di e meta F3 di e Landspakket. Den cuadro di diversificacion di economia lo inicia otorgamento di permiso pa industria di cannabis medicinal.

Aña 2024/2025

Mientras cu ta continua cu proyectonan y vision 2021 te 2023, e vision pa 2025 lo encera aceptacion di maneho innovativo y sostenible pa desaroyo di e isla, cu enfoque riba portanan di entrada, un infrastructura sostenible, cu enfasis riba recuperacion di turismo. E metodo di “low impact-high value” lo funciona como fundeshi principal di e maneho, caminda tur esfuerzo di mercadeo lo pone enfasis riba e bishitante afluente, cu e obhetivo pa aumenta e impacto economico cu e turista ta laga atras financieramente.

Ministerio di Turismo y Salud Publico lo traha hunto cu Aruba Tourism Authority ygremionan den un manera innovativo pa genera un impacto positivo riba e economia, dirigi no pa cantidad, sino calidad di turismo. Aruba mester bira e destinacion mas bishita den e islanan Caribense pa un turismo sostenible. Aspectonan cubri den esaki ta: Turismo sostenible; inversion; innovacion; aumento di valor economico for di turismo; y portanan di entrada.

Lo traha riba innovacion pa por implementa un conexion electronico directo pa e resultadonan internacional, cu ta duna un posibilidad pa turismo haya un “automatic preclearance” cu ta bay habri caminda pa por acepta “full remote check in”.

Cu expansion y colaboracion cu partnernan lo expande e sistema di ED Card pa por automatisa e proceso di salud, pero tambe pa un mihor control na frontera pa por controla si e turista ta cumpli cu tur DVG su normanan y protocolnan.

Pa optimalisa e proceso di permiso di horeca lo reforma esaki completamente y alavez e manera di con ta usa y interpreta dato di turismo. Esaki a base di un entidad nobo cu obhetivo di ta sostenible riba su mes. Beneficio pa pais Aruba lo ta cu pa promer biaha den historia lo tin tracking di dato di turismo y tambe lo evita desaroyonan no sostenible den sector di turismo. Segun e ministerio, contribucion na caha di gobierno lo aumenta tambe unavez tin tracking riba tur e acomodacionnan riba plataformanan manera AirBnB.

Segun e ministerio, tin dos proyecto ambicioso pa eleva e producto Aruba mas ainda, posicionando e isla como pionero den Caribe, cu ta Gateway 2030 na Aruba Airport Authority y Port City, cu ta parti di e masterplan di Aruba Ports Authority. Ta spera cu ambos proyecto lo contribui enormemente na desaroyo economico di Aruba y lo crea mas oportunidad di trabao pa localnan. Pa loke ta e producto turistico, ambos proyecto lo mehora e infrastructura di e portanan di entrada pa por brinda mihor servicio na e bishitante.