(Dutchnews) – E aumento cu a mira den studiantenan stranhero ta menasando cu abruma e universidadnan na Hulanda. Pero e problema, segun profesor Annette de Groot, a ser causa pa e mesun universidadnan aki.

Optando pa conduci un porcion grandi di nan cursonan completamente na Ingles, cu un 71.6% di e total, universidadnan Hulandes a haci nan mes iresistibel pa studiantenan stranhero. Awo nan ta luchando pa lidia cu e efectonan di nan politica di lenguahe, cual ta empeorando e crisis di vivienda nacional.

E aumento den studiantenan stranhero ta un resultado directo di e ausencia di un barera di lenguahe.

Ora cu den e aña academico di 2018/2019 e programa di psicologia na Universiteit van Amsterdam tabata completamente na Ingles pa prome biaha, e cantidad di studiantenan stranhero den e prome aña a aumenta di 12 pa 259 di biaha, cual ta 54% di e poblacion. Actualmente, e porcentahe aki a subi te cu 70% di e cantidad total di studiante.

E mesun caso aki a sucede den otro partinan di e pais y cu otro programanan tambe. 5 di e 8 cursonan di psicologia na Hulanda cu ya caba tabata provee un programa completamente den Ingles den aña 2017 pa 2018 tabatin mas studiante stranhero cu Hulandes den e prome aña. Den e dos casonan aki, e balansa a keda perdi completamente, cu un mayoria di studiante stranhero di 79% y 83%.

Di e studiantenan den nan prome aña den sector di ciencia di comunicacion y economia na Universiteit van Amsterdam, 63% y 56% respectivamente a bini for di exterior. Den e ultimo aña academico, un total combina di 14,955 studiante stranhero tabata inscribi den dos universidad di Amsterdam. Na e Universiteit van Groningen, cual recientemente a bati alarma relaciona cu escasez di acomodacion pa studiante, 8,254 studiante tabata inscribi. E cantidad total di tur universidad Hulandes tabata di 70,248.

E cifra aki ta representa centenares di caya, cantidad di bario, y un ciudad chikito den vivienda. E ta representa tambe miles di studiante Hulandes cu no tin otro opcion mas cu biba cu nan mayornan pa motibo cu inversionista buscando ganashi ta kita e tiki casnan disponibel for di personanan buscando un caminda pa biba, cual tambe ta causa cu e prijs di e luganan cu si te ainda ta disponibel, ta aumenta drasticamente.

LEAVE A REPLY

Please enter your comment!
Please enter your name here