Durante parada grandi di carnaval, diadomingo cu a pasa, Plastic Beach Party a colecta desperdicio di 70 kavel cu a registra pa separa plastic. PBP ta un iniciativa ambiental di Metabolic Foundation y ta dirigi den participacion cu comunidad, segun e comunicacion ricibi di e foundation.
Diadomingo ultimo na final di nos gran parada di Carnaval na Playa, team y boluntarionan di Plastic Beach Party a colecta desperdicio cu a registra pa separa plastic y cu a haci un donacion na e proceso di reciclahe. Tambe a piki plastic los riba e ruta y a acepta plastic di e publico.
Ta di dos biaha cu PBP a ofrece e servicio di reciclahe na e kavelnan di carnaval na playa y e participacion a mas cu redobla. Pues cada biaha mas persona ta consciente di e problema di desperdicio riba nos isla y ta complaciente di tuma accion y contribui na reciclahe local.
E biaha aki PBP a colecta; 17.5 kilo di plastic, 10.7 kilo di bleki y 50 kilo di boter di glas. Mayoria di e plastic ta cups (1.240) y boter di bebida (564), pero tambe a haya 97 forki y otro pakinan di cuminda (32 saus/fruit cups) por ehempel. Plastic Beach Party lo ta procesando tur e plastic, e boternan di glas lo wordo debolbi pa re-uzo na Brouwerij Nacional Balashi NV, y e blekinan di aluminium lo wordo entrega na Daltra Antilles NV pa reciclahe.
Plastic Beach Party ta hopi contento cu e reaccion cu nan ricibi di publico. Nan ta gradici cada grupo y kavel cu a aporta na un economia circular riba nos isla y cu a haci nan best pa separa plastic durante parada. Un danki ta bay na tur boluntario, specialmente studiantenan di Universidad di Aruba cu ta forma e grupo ambientalista MAGEC. Tambe ta aplaudi Aruba Tourism Authority (ATA) su entusiasmo di a cuminsa recicla prome cu parada grandi caba. Finalmente un danki ta bay na Marinierskazerne Savaneta cu a brinda un espacio patras di nan steelband pa asina Plastic Beach Party por a colecta prome cu last lap.
E prome y unico facilidad cu ta recicla plastic na Aruba ta situa na Flemmingstraat 26 na Playa y ta habri tur diasabra di 12or di merdia pa 6or di atardi. Pa cualkier otro afspraak den siman por yama of Whatsapp +297 630 2475 of subi website www.plasticbeachparty.com pa mas informacion.
