Ayera mainta durante un conferencia di prensa Archivo Nacional Aruba, conhuntamente cu UNOCA y Biblioteca Nacional Aruba a anuncia e siman di Dutch Caribbean Digital Heritage Week cu ta bay luga otro siman, como tambe e lansamento nobo di e plataforma Coleccion Aruba.

 

Ray-Anne Hernandez directora UNOCA, a splica cu manera ta conoci na september ultimo e plataforma Coleccion Aruba a lansa e website coleccion.aw oficialmente. Esaki ta un plataforma caminda cu por busca y haya informacion tocante Aruba.

El a sigui splica cu ma momento cu a cuminsa cu e plataforma aki tabatin tres partner cual tabata UNOCA, Biblioteca Nacional Aruba y Archivo Nacional Aruba, y aworaki tin 11 partner den e coleccion aki caminda cu diferente instancia gubernamental y no gubernamental ta pone nan coleccion y informacion historico y cultural riba e pagina aki pa asina por haci informacion accesibel pa comunidad di Aruba.

Durante e simposio aki, Hernandez a indica, ta bay trata e herencia digital di Caribe Hulandes y lo ta cuminsando dia 8 di april cu e lansamento di e mesun website coleccion.aw, pero den un bachi nobo.

El a remarca cu e website aki ta uno cu ta unico den Reino, mirando cu tin diferente aspecto cu ta haciele apart. Banda di e parti di colaboracion cu a wordo menciona caba, Hernandez a resalta cu nan ta e unico te cu aworaki caminda cu por coba den documentonan bieu usando inteligencia artificial pa lesa textonan cu normalmente e generacion nobo aki no por lesa mas, pero cu e inteligencia artificial por lesa cu ‘“hand text recognition” cu documentonan colonial.

El a agrega cu loke tambe ta haci e colaboracion y e plataforma aki unico ta e hecho cu nan tin colaboracion internacional cu partnernan rond di mundo di tanto na Merca, Europa y den mesun Reino.

Raymond Hernandez director di Archivo Nacional Aruba a splica cu desde cu nan a desaroya e concepto aki di coleccion.aw y cu el a wordo presenta na Aruba, nan a presenta esaki tambe riba un plataforma internacional den Caribe aña pasa, como tambe na Sint Maarten durante un discusion di sclavitud.

El a sigui splica cu como Coleccion Aruba nan a dicidi cu nan kier haci algo pa mustra, en todo caso e Caribe Hulandes, cu tin un potencial den loke nan a crea. Den cuadro di esey e plataforma Coleccion Aruba ta organisa un siman di actividadnan cu ta bay enfoca riba e topico di con ta conecta e informacion di herencia cultural di tur e islanan di Caribe, pero tambe di e material cu tin na Hulanda, den un forma digital.

“Esey ta e meta di e Dutch Caribbean Digital Heritage Week. Basicamente e prome dos dia ta pa un publico mas grandi den sentido cu nos a haci un forma di simposio pa dos dia na unda cu ta bay tin hopi informacion, entre otro riba nos plataforma mes, unda nos ta bay usele como modelo, y banda di esey tin informacion di diferente instancia, tanto Mericano, den caso aki Internet Archive, cu a bira e plataforma cu ta carga coleccion.aw, y tambe instancianan Hulandes cu tambe lo t’ey pa hunto intercambia y wak kico ta e situacion den Caribe pa asina nos yega na un nulmeting pa wak te con leu e cooperacion por sigui den Caribe Hulandes,” Hernandez a indica.

El a sigui splica cu banda di e dos dianan di simposio tin dos dia dedica na trabaonan interno, pa discuti cu otro ki forma di cooperacion por bay tin, cooperacion digital, y tambe nan ta bay wak con un plataforma asina por funciona pa Caribe Hulandes.

Hernandez a indica cu lo cera e siman aki riba e ultimo dia cu un dia unda por bin cu recomendacionnan pa e gobiernonan, e instancianan mas halto, institutonan cu mester por coopera cu otro pa por yega na e tipo di cooperacion cu nan ta desea.

Banda di lansa e website den su bachi nobo, el a agrega, Coleccion Aruba kier logra fortifica e cooperacion den Reino Hulandes pa medio di intercambio digital di materialnan historico, cultural y tambe informacion nobo y recien.

“Den un solo sitio tur hende por yega na informacion di Aruba. E bunita di e caso aki ta cu den esun di Aruba nos tin tambe e parti cu otro islanan tin informacion di nan riba nos website y cu nan ta usando esey na e momentonan aki,” el a resalta.

Un primicia cu Hernandez a anuncia ta cu durante e prome dia di nan conferencia, banda di lansa e website den su bachi nobo, nan ta bay demostra con por sigui famianan, cuminsando cu e registro di esclavo. E intencion, el a indica, ta pa conecta cu otro registro pa asina por sigui con e famianan a move na Aruba, wak di unda nan a bin y unda nan por a bay. “Nos idea ta pa juist convence e islanan pa nan tambe por tin e material ey online accesible pa nos por sigui famianan den otro,” el a subraya.

Astrid Britten directora di Biblioteca Nacional Aruba a expresa como un di e partnernan fundador di e plataforma aki, nunca nan a pensa cu ora cu nan colega Peter Scholing a cuminsa cu e proyecto aki na aña 2019 como Coleccion BNA (Coleccion Biblioteca Nacional Aruba) cu cinco aña despues nan ta papiando di Coleccion Aruba hunto cu e diferente partnernan.

“E parti cu mi ta kere ta resalta ta e parti di innovacion y cooperacion. Manera cu a wordo menciona caba e parti di reconocemento di escritura di e documentonan bieu cu bo por reconoce nan, ta di gran balor. Loke ta importante tambe ta cu mas y mas a mira e importancia y cu e siman cu ta bin ta bay tin e reunionnan aki na Aruba,” el a resalta.