Ayera mainta algun medio local a presenta na warda di polis di Macuarima na Santa Cruz pasobra Jeffrey Schuilenburg a haci un denuncia contra e locutor di radio Michael Williams, pa cierto declaracion cu e lo a haci durante un programa radial.

Schuilenburg a splica cu tin programanan radial na unda hende ta expresa nan opinion y desde hopi tempo su persona ta haci esey, unda Schuilenburg y Williams tin opinion diferente den varios aspecto.

Schuilenburg a informa cu durante un programa radial Williams a bay hopi leu y a acusa su persona di tuma droga for di botonan cu ta bin for di otro paisnan manera Venezuela of Colombia, pa motibo cu e ta traha na Aduana, y tambe Schuilenburg a comenta cu segun Williams tin prueba di esaki y cu su coleganan ta testigo di tur lo cual e ta haci.

“Mi sa cu hopi biaha pa mi expresionnan politico por ta cu tin hopi hende cu no gusta mi, pero esaki ta un falta di respet,” Schuilenburg a sigura.

Tocante e denuncia cu el a entrega, Schuilenburg a bisa cu e ta haciendo su parti di loke e ta kere cu mester haci y e ta spera cu di parti di Ministerio Publico por cuminsa cu un investigacion.

Schuilenburg a bisa cu su abogado a traha un carta pa Williams na unda ta señala cu e tin 7 dia pa rectifica y asina tambe el a manda e carta pa director di e radio emisora.

Den e caso aki, ta trata di e emisora Hit 94 cu tin Jhonny Habibe como director, cu segun loke Schuilenburg mes a manifesta, e (Habibe) no ta responsabel pa nada di lo cual hende ta papia na radio y Schuilenburg ta respeta esey. Sin embargo, e ta kere cu pasobra su radio emisora ta envolvi den e asunto, el a manda un copia pa Habibe, aunke e ta sigura cu e no ta acusa Habibe di nada.

Tambe Schuilenburg a expresa cu ora cu un hende cuminsa bay un tiki leu den loke nan ta bisa na radio, mesora mester para nan y e ta kere cu Habibe hopi biaha ta permiti e persona bay demasiado leu, sin para nan.

“Mi ta spera cu den futuro, cu ora Habibe ripara cu un hende ta bay demasiado leu, e ta bay corta esey of ta par’ele,” Schuilenburg a bisa.

Pa finalisa, e ta spera cu Williams tin e pruebanan di cual e ta papia y cu tur e acusacionnan cu Williams a haci contra su persona no bay afecta su bon nomber.

 

 

LEAVE A REPLY

Please enter your comment!
Please enter your name here