Control KPA (1).jpg

Durante fin di siman Flex-Team di polis a sigui cu su controlnan, cual un biaha mas tabatin resultado. Total tabatin 10 detencion di sospechosonan.

 

Esaki ta informacion for di un relato di polis.

 

Durante e siman di accion (28 november pa 4 december) a haci 176 control y 26 auto a wordo para. Resultado di siman 30 tabata 10 detencion di cual 2 pa falta di papel, uno pa uzo di mas di alcohol, tres pa uzo di forsa, 4 pa uzo di forsa, maltrato di ambtenaar y menasa ambtenaar cu morto.

 

Flex-Team a haci nan surveillance unda cu nan a topa agrupacionnan na e sitionan manera, entre otro, Manuelitos, Cirkle-K, Hotel Bacarat, casnan di pueblo Noord, Madiki y Seroe Patrishi nan a baha cu man duro.

 

Luganan manera Lekker, Olde Molen, Cas Casuela y +297 a wordo controla pa ora di cera y tambe a percura pa esnan presente bay cas mesora. Mirando e situacion di e ultimo acontecimento unda tabata tin tiramento a bay Arendstraat, Canoastraat y Korvetstraat unda na haltura di Canoastraat/Korvetstraat banda di Budweiserbar nan a haci control riba hobennan conoci pa polis. Esaki ta un sitio conoci pa traficacion di droga y e agrupacion a wordo manda cas.

Bayendo pa e vecindario di casnan di pueblo na Bushiri, Madiki Kavel, Seroe Patrishi, Sabana Basora Noord y Noord como tambe Duartestraat y Heidenstraat e team cu no ta drumi a haci control den Duartestraat, Heidentstraat y Noord mirando cu aki tabata tin tiramento un tempo atras.

Otro accion di Flex-Team tabata e control di agrupacionnan na Eagle Beach y The Village unda e hobennan aki ta djis para cu nan auto y scucha musica hopi duro combinando esaki cu bebemento di bebidanan alcoholico. Nan ta wordo atendi door di papia cu nan y splica nan cu  e musica mester stop pa 11:00 pm y cu nan no por keda eynan

Durante control den Heidenstraat Flex-Team a para un auto cu tres integrante di cual uno naci na Curaçao y dos na Venezuela. E dos Venezolanonan a wordo deteni.

Riba diasabra 3 di december casi 3’or di madruga, durante un control e team tabata riba parkeerplaats di The Village ora cu un personal di siguridad di e localidad “Gusto” a acerca nan pa un pelea andando. E miembro di siguridad logra stop e pelea y a wak e hobennan core bay patras di e parkeerplaats y a laga un hoben mal bati. E miembro di siguridad a cana cu e polisnan y mustra nan unda e hobennan tabata ta. Mesora a detene tres sospechoso y a hiba nan warda di Shaba. 

 

Durante control den Hendrikstraat a detene e conocido di polis, POP, banda di KFC. POP tabata kier a tira piedra riba e team cu a conduci na su detencion unda cu e la wordo hiba warda pa descansa un poco.