Diahuebs anochi, 24 di Maart, a drenta informe di un caso di atraco arma na un luga di bende number na Piedra Plat. Patruyanan a wordo dirigi na e sitio y na yegada a bin compronde cu 2 persona nacionalidad Latino lo a drenta na e luga y a comete atraco arma unda nan a bay cu un suma di 1100 florin. Polis ta investigando e caso aki ainda hunto cu Atraco Team pa asina purba saca afo ta kico a pasa y detene e 3 sospechosonan aki.
Siguiente nos tin un reportahe cu a wordo manda prensa for di KPA relaciona cu esaki:
Ministerio Publico a duna ordo di detencion pa dos sospechoso acusa di tabata envolvi den un caso di atraco arma diahuebs ultimo alrededor di 8:24 na Piedra Plat Lottery. Eynan dos homber arma a drenta y bou menasa cu arma a logra bay cu alrededor di Afl. 1100,= di e benta di e atardi. Ambos a subi un auto cu glas getint.
Te na e momento aki Polis no tin informacion di e nomber of adres di e sospechosonan, pa cual ta haci un apelacion na comunidad, basariba e imagennan capta den e camara di siguridad di e oficina di number, pa yuda identifica e sospechosonan. Husticia ta considera nan peligroso y nan por ta arma, pa cual nan detencion rapido ta necesario.
Fiscal a dunaordo pa detene nan mesora, basa riba sospecho di lo a comete varios delito cu ta castigabel pa ley, segun nos “Wetboek van Strafrecht”. Ta urgi comunidad pa yama Polis mesora, den caso cu tin mas informacion. Tambe por haci uzo di e number 11141 pa laga informacion atras den forma anonimo.
