Gobierno di Aruba a asumi responsabilidad pa e personanan di exterior cu den e situacion di crisis tabata den nos teritorio, y den e emergencia cu a surgi, unda nan a keda sin entrada, tabata haya ayudo di parti di Hulanda. Financiamento awor ta nos responsabilidad y mester cumpli cu esaki. Nos ta tuma sin mas como punto di salida cu esey ta bay sucede tambe. Pero tin mas pregunta.

Por ehemplo, kico ta e perspectiva pa nos por resolve e problema aki di e grupo, aparentemente grandi, di ciudadano Venezolano cu pa gran mayoria no lo cualifica pa un status di refugiado, pasobra nan a yega aki, sea via costa o via aeropuerto (e mayoria), y no a reclama tal status di biaha. Mas bien nan a busca lugar di keda y a logra haya trabao tambe, y si no tabata pa Covid-19, probablemente nos no lo a yega na sa mes con grandi e grupo aki ta. Ta den e crisis nos a bin tende cu ta trata di sigur 15.000 persona, aunke nos a tende otro cifra mas impresionante ainda. En todo caso, duna di come na un grupo cu ta mas di 10% di nos poblacion legal no ta un tarea cu cualkier gobierno lo kier eternaliza. Esey ta trece e siguiente pregunta: kico ta e perspectiva di un regreso sigur pa e personanan aki?

Pa haci esey nos mester contempla e situacion na nan pais, algo cu nos ta haci diariamente como medio di comunicacion y ta comparti esey cu nos lectornan. Pa ta franco, nos no ta mira tanto avance a corto plazo. E pais ta bayendo pa un decada completo di caida economico, unda gran parti di e industria cu e pais tabatin, a desaparece caba. Manera ta ampliamente conoci, e actividad cu mas ta trece divisa aden, petroleo, awendia ta un sombra di loke e tabata, cu un produccion di alrededor di mitar miyon bari pa dia, unda esaki tabata riba 2 miyon pa dia na 2016. Produccion di cuminda tambe a sufri bao di desorganisacion ‘socialista’, e di tantisimo prueba cu e ideologia aki por ta tema di conversacion cu un trago den man, pero como maneho economico di un pais mester bay den bari di sushi. Pero e mismanagement dio un regimen socialista no ta keda limita na sector economico, sino cu henter gobernacion ta paraliza den su tareanan clave, salvo loke ta sirbi pa e top di delincuentenan aki. Manera e cuerponan uniforma, cu ta responsable pa reprimi cualkier intento di oposicion pa organisa nan mes.

Oposicion no tin ningun forza interno y ta solamente organisa den exterior y tin cierto margen di presencia, pasobra Merca como protector di e presidente interino autoproclama a duna un advertencia asina fuerte y cla, cu hasta Maduro a comprende cu eliminacion di Juan Guaido lo significa fin di su reino di teror. Pero mientras tanto, no tin nada ta move. Bao di e capa di ‘motibo humanitario’ e propio ‘aliadonan Europeo’ di oposicion a keda suministra diesel na e regimen, pa complace e dos empresanan petrolero grandi di Spaña y Italia, Repsol y Eni, cu tin interes economico grandi na Venezuela. Igualmente Merca ta permiti un empresa manera Chevron proteha su inversionnan na Venezuela, unda nan ta yuda, indirectamente, e regimen aki di prolonga su mes den poder. Di otro banda, cadavez cu oposicion mester di un declaracion di solidaridad, sea di Merca o di Union Europeo, nan por haya esaki, pero te ey tambe. Hasta Hulanda no ta mira na promer lugar e interesnan di e islanan cu ta na frontera cu Venezuela, pero ta contempla primeramente interesnan economico Hulandes a largo plazo.

Na e momento aki e partidonan ta trata di yega na negociacion, unda e impresion ta cu di banda di oposicion nan ta mas desespera pa negocia cu e regimen mes. Ta berdad cu entrada di divisa di e pais a cay masha hopi mes, pero mientras e pueblo ta pasa hamber, gobierno tin suficiente pa mantene su mes den poder, privilegiando e elite militar cu tambe ta comprende bon cla cu ta nan tin di perde grandemente si e regimen criminal aki no t’ey mas. Den e situacion aki por bay dura varios aña pa algo sustancial sucede, y ta obvio na e momento aki cu, mientras tin un programa reduci di hende cu ta bolbe nan pais, e fluho cu ta saliendo ta hopi mas grandi. Entre mil pa dos mil persona ta bandona e pais diariamente actualmente, loke pa e aña aki so ta significa sigur mey miyon migrante mas.

Kico esaki ta significa pa maneho cu gobierno di Aruba lo mester hiba? E experiencia na otro paisnan den un situacion parecido ta cu hende ta adapta durante tanto aña bibando den pais ajeno. Nan yiunan ta nace o en todo caso ta lanta aki entre nos, y realmente no conoce otro realidad cu e Aruba di actualidad. Ademas, te cu e pandemia a yega, mayoria di nan tabata traha y tabata mantene nan mes aki. Pa nos tin nan registra, y ta duna nan di come, no ta mihor nan traha? Claro, semper dunando prioridad na e trahador local, unda esaki ta disponible. Pero tin miles di empleo cu nos hendenan no ta haci. Esey nan tabata haci, te na e crisis aña pasa…

LEAVE A REPLY

Please enter your comment!
Please enter your name here