Companianan di UTV no ta respeta leynan di Aruba ni tereno priva di individuonan y e tabata hopi bisto den fin siman.

Personanan cu tabata cana patras di California Lighthouse a denuncia cuanto vehiculo UTV tabata core den e duinnan, area cu ta completamente prohibi pa subi cu vehiculo di motor. Duinnan ta legalmente protegi pero pa un of otro manera companianan cu ta hiba turistanan den tours of ta huur e mashinnan, no ta informa nan clientenan debidamente.

Esey ta motibo tambe pakico Fundacion Parke Nacional Aruba a manda un proposicion pa Minister encarga cu Medio Ambiente Evelyn Wever Croes pa mira con pa yega na un acuerdo pa por trece control riba e mal uso di area y actividad cu ta destrui no solamente nos duinen pero ta pone hopi parha, incluso shoco na peliger.

Pero tampoco e companianan di tour ta respeta tereno priva. Un biaha mas ta habri baricada cu doñonan di Plantage Andicuri a pone pa evita cu tournan di UTV por pasa. Sinembargo, a logra saca potret con un guia di un di e tantisimo tournan, ta djis kita e baricada, despues cu algun dia, ekiponan pisa di desconocinan a hala e barancanan grandi cu e doño a pone pa stroba e pasada di UTV.

Bon Dia Aruba a manda un serie di pregunta na Prome Minister Evelyn Wever Croes kende ta encarga cu medio ambiente pa puntra si Gobierno ta preocupa cu e desaroyo aki y kico tin pensa di haci. E contesta cu a ricibi ta cu Sra. Wever Croes ta hopi ocupa cu formacion di Gobierno.

Bon Dia Aruba lo keda pendiente di e desaroyo aki.

LEAVE A REPLY

Please enter your comment!
Please enter your name here