A pesar cu aki na Aruba no tin ningun hende muhe na estado cu a wordo diagnostica cu Zika, specialistanan ta tuma medidanan mas drastico awo di prevencion. Personanan plania pa sigui tratamento di fertilidad mester warda un rato cu esaki segun ginecologo, como medida di prevencion contra microcefalia.
Un pashent a presenta na Bon Dia Aruba den forma exclusivo pa splica un situacion cu el a haya su mes aden cu su dokter. E pashent aki ta siguiendo proceso pa e por haya tratamento di fertilidad pa e por sali na estado. Sinembargo e siman aki su dokter a bisa cu e no por haci esaki na e momentonan aki. Motibo: Hospital kier mira desaroyo di Zika.
Den contacto cu Charlaine Huntington vocero di Hospital, el a bisa cu en principio e maneho cu Hospital ta hiba den e caso di hendenan muhe na estado of cu ta plania pa sali na estado ta: “Nos ta des conseha nan pa sali na estado, teniendo na cuenta e risiconan manera microcefalia cu ta wordo investiga si e mama mester haya Zika.”
Na e momento ey Hospital no tabata informa riba otro informacion cu ginecologonan lo ta dunando pues a bay informa tocante esaki cu ginecologo Huisman. Informacion cu el ricibi ta cu berdad ginecologonan tin un stop na tratamento di fertilidad aworaki.
Medida di prevencion
Segun Sr. Huisman, World Health Organization (WHO) a bisa pa practicanan medico stop di duna tratamento di fertilidad como un medida di prevencion contra e posibilidad pa e baby nace cu microcefalia den caso cu e mama keda infecta cu Zika durante embaraso. Teniendo cuenta cu Aruba ta forma parti di e paisnan cu tin transmision local pa motibo cu nos tin e sangura Aedes Aegypti aki, a opta pa stop cu e tratamento di fertilidad pa awo. El a sigui splica cu esey no kiermen cu un pashent no por yama pa haci cita, of pasa na balie di e ginecologo. Afspraak lo continua, y e ginecologo lo conscientisa e hende muhe cu kier sali na estado riba e riesgonan cu por tin y ta splica con ta manehando e situacion di Zika. Claro cu si un hende muhe sali na estado den forma natural, e embaraso t’ey caba, y lo keda check e muhe y desaroyo di e baby. Den caso cu constata cu un baby no ta desaroyando bon, ta avisa e mama y ta mustra riba e opcionnan cu e tin e momento ey, y tambe e reto di trece un yiu cu microcefalia na mundo. E decision final ta di e mama.
Mas estudio cu ta sostene link microcefalia Zika
Por bisa cu desde e cantidad di casonan di microcefalia na Brazil a bira publico, diferente instancia ta purbando di haya sa kico ta e link y e probabilidad pa un baby haya microcefalia den caso cu e mama haya Zika durante embaraso. Awo tin un estudio nobo, segun Medical News Today, un estudio a wordo haci cu ta indica cu 1 den cada 100 hende muhe infecta cu Zika ta na riesgo di microcefalia. Dokter Simon Cauchemez di Paris y coleganan ta bisa cu nan resultadonan ta provee mas evidencia cu e virus Zika ta asocia cu microcefalia. E condicion neurologico cu por resulta den baby nan cu ta nace cu un cabes mas chikito cu normal.
Ta luna pasa WHO a declara Zika como un emergencia di salud internacional, un decision sosteni pa e link cu tin entre e virus y microcefalia. Mientras cu e asociacion aki ainda mester wordo prueba cientificamente, tin un cantidad di caso di microcefalia na Brazil, unda cu transmision di Zika ta andando. Microcefalia na e pais ta 20 biaha mas halto cu añanan anterior.
Estudio nobo
Pa e estudio Sr. Cauchemez y coleganan a uza data di e incidente di microcefalia durante brote di Zika na Polinesia Frances cu a tuma luga October 2013 pa April 2014. Durante e periodo aki 66% di e populacion general a wordo infecta cu Zika y ocho caso di Microcefalia a keda identifica, 7 di e casonan aki a sosode dentro di e periodo di 4 luna, cerca di e final di e brote. Haciendo uzo di estadistica matematico, e investigadonan a calcula e riesgo di microcefalia cu infeccion di virus Zika durante 6 diferente periodo di embaraso. Trimester 1 y 2, trimester 1, 2 y 3, trimester 2, trimester 2 y 3 y trimester 3. Pa yega nan calculacionnan e team a uza data di e cantidad total di caso di microcefalia, e cantidad di casonan sospecha di Zika a base semanal, e cantidad di nacemento cu tin durante di e brote y testnan di sanger tuma prome cu e brote cu ta confirma presencia di “antibodies” contra virus Zika.
E investigadonan a saca afo cu hende muhe cu a wordo infecta cu Zika durante e prome trimester di embaraso ta nan riesgo mas grandi pa haya microcefalia. E team a calcula cu 95 den 10 mil of mas o menos 1 den 100 hende muhe infecta cu Zika den e prome trimester di embaraso ta na riesgo pa microcefalia.
