Wolff psoriasis.jpg

E dia aki 29 di october, ta e dia cu e Federacion Internacional di Asociacionnan di hendenan cu tin Psoriasis na diferente paisnan, na 2004, a proclama como World Psoriasis Day.

 

E dia aki ta dedica specialmente na tur esunnan cu ta biba cu  Psoriasis y/of  Arthritis Psoriatico. Gregorio Wolff cu tambe ta biba cu e malesa, ta splica mas riba e dia aki y di e malesa y su impacto riba bida den e relato aki. Abou e ta invita pashentnan pa un encuentro y pa wak e posibilidad pa lanta un fundacion.

 

Dia mundial

E 4 obhecion pa e dia aki pero sigur pa tur otro dia durante henter aña ta lo siguiente:

  1. Hisa e conscientisacion cerca tur hende, di e malesa Psoriasis;
  2. Yuda y curasha esunnan cu ta duna e cuido medico;
  3. Duna informacionnan relevante ariba Psoriasis;
  4. Duna e pashentnan di Psoriasis un plataforma pa eherce nan bos.

 

Psoriasis ta un malesa incurabel

Psoriasis ta un desorden increibel y persistente di e cuero di e persona cu Psoriasis, cual ta ser caracterisa cu un multiplicacion di te cu 10 biaha mas lihe cu normal, di e celnan.

E causa di Psoriasis no ta conoci, maske hopi cientificonan ta kere cu e ta hereditario.

Den mayoria di caso e ta core den famia, tata of mama por pas’e pa yiu, tin biaha pa nieto(a).

Actualmente tin hopi remedi cual nan ta yuda combati e malesa aki, pero cura no tin ainda.

Pero, nos cu ta biba cu Psiorasis tin speransa grandi, cu algun dia, por ta pronto cu lo tin remedi pa cura Psoriasis.

Mientrastanto nos tin cu biba cu Psoriasis y dia pa dia haci nos bida mas miho y agradabel.

 

A pesar di hopi cos, nos ta maneha nos bida

Esunnan cu ta sufri di Psoriasis sa con dificil e ta pa biba cu Psoriasis.

Nos ta pasando hopi biaha den momentonan dificil, sacrificando hopi tempo pa combati e malesa, pero tambe pa nos ta representativo.

Hopi biaha comentarionan bruto di esunnan cu no sa di e malesa aki ta haci e pashent sinti su mes malo y tristo, pasobra hopi biaha e pashent no sa con deal cu e situacion aki, menos ainda esunnan cu ta haci e comentarionan bruto aki.

Tin casonan cu ta yega te na un extremo cu ta discrimina e pashent cu Psoriasis, pa falta di conocemento. Ora di selecciona Trahadonan pa cierto funcion, maske e pashent cu Psoriasis ta e miho, e no ta ricibi e funcion. Den caso extremo, Psoriasis ta bira e motibo pa retiro.  

Con cu bay of bini nos cu ta pashent di Psoriasis, nos sa di maneha nos mes den e mundo cu no ta, of no kier comprende e situacion cu nos ta aden.

 

Encuentro pashent di Psoriasis

Sr. Wolff ta manda un cordial invitacion na tur pashent di Psoriasis pa asisti na un encuentro diasabra awor, cu ta cuminsa 2or di atardi na sede di SEPPA, pazuid di School EPB na Hato. “Meta di e encuentro aki ta pa prome, cera conoci cu otro, pa nos sigui topa cu otro y si por, pone un base pa lanta un asociacion na Aruba di pashentnan cu Psoriasis”, asina sr. Wolff ta bisa. Dermatologo N.M. Lampe tambe lo ta presente pa duna informacion y contesta preguntanan.

LEAVE A REPLY

Please enter your comment!
Please enter your name here