Di varios banda redaccion di Bon Dia Aruba a haya comentario y pregunta tocante e imposibilidad di manda placa pa exterior, den varios diferente tipo di caso. Esaki ta en berdad un realidad, a base di decision di Banco Central di Aruba pa duna proteccion na e reservanan di divisa cu Aruba tin ainda na e momento aki.
Pa esaki e organismo regulador a emiti e Disposicion di dia 27 di maart, cu ta referi na e anterior Disposicion di 17 di maart 2020, unda ta anuncia cu e Decreto encuanto Transaccion den moneda exterior 2013/K.2 (Permiso General di Transaccion den Moneda exterior) “a keda suspendi, entrante inmediatamente, pa tur transaccion saliente di capital den moneda stranhero.
Relaciona cu esaki, Banco a publica tambe den un ‘Q & A’ (cu solamente ta disponible na Ingles, un lista di e transaccionnan inclui den e medida aki. E lista aki, pa cual por lo pronto no ta emiti permiso pa dispone di divisa pa pago den exterior, ta:
- Otorgamento di prestamo na no residente;
- Haciendo inversion den exterior;
- Participacion den un empresa stranhero;
- Compra di bienes inmueble na Aruba o den exterior di un no-residente;
- Transaccion pa cuenta propio den exterior pa un persona natural;
- Transaccion pa cuenta propio den exterior pa persona huridico y demas entidadnan;
- Transaccion pa ‘intercompany account’ o pa compania afilia, pa un entidad legal; y
- Otro transaccion saliente di capital manera regalo, donacion y herencia.
Cu e medidanan aki, mayoria di transaccion financiero pa exterior a keda cancela. Segun un fuente na un banco comercial e medida aki ta di comprende, pasobra sin e entrada regular di e divisanan cu Aruba ta haya normalmente di turismo, loke tin na divisa mester ta reserva pa por ehemplo importacion di e productonan absolutamente necesario pa comunidad y economia por funciona.
Esaki ta implica tambe cu e ciudadanonan cu tin cuenta den divisa den exterior, no por manda placa pa nan propio cuenta na e momento aki.
Ki tipo di transaccion si a keda permiti? Segun e mesun Q & A di Banco Central, ainda ta permiti lo siguiente:
• pago relaciona cu importacion y ricibimento di placa pa exportacion di bienes
• pago di gasto di flete y seguro pa transporte internacional
• pago y ricibimento di gasto di biahe y acomodacion na/ di no-residente
• pago y ricibimento di huur na/ di no-residente
• pago y ricibimento di placa pa trabao haci y servicio duna pa/for di no-residente.
Tambe e asina yama ‘remesa familiar’ no ta cay bao di e restriccionnan di Banco Central, en todo caso, no te na e momento aki. Ta anticipa cu esakinan lo mengua tambe, mirando cu hopi ciudadano di otro nacionalidad a perde empleo den e dianan aki. Bon Dia Aruba a trata di comunica cu Banco Central riba e tema aki, pero esey ayera no tabata posible.
Di otro banda, tur transaccion cu ta encera capital bin Aruba ta permisible.
Comments are closed.