Despues cu ministro encarga cu Desaroyo Teritorial, Infrastructura y Medio Ambiente, Marisol Lopez-Tromp, a duna di conoce su maneho encuanto ampliacion di sector hotelero den proximo añanan, parlamentario independiente Daphne Lejuez a manda un serie di pregunta pa e mandatario riba e mesun tema.

Principalmente el a reacciona riba e anuncio di e ministro cu lo tene e cantidad di camber pa e proximo añanan limita na 2.000, y cu despues lo amplia esaki cu 1.400 mas den e cinco añanan despues, segun su carta.

El a haci e pregunta, mirando e situacion actual di coronavirus y e pronostico mundial pa aviacion unda ta proyecta cu vuelonan lo normalisa te alrededor di aña 2023, con e mandatario ta pensa cu e ampliacion di camber anuncia ta cuadra cu e situacion mundial. Aruba realisticamente por yena e cambernan aki?, ta su pregunta adicional. Relaciona cu esaki ta pidi si e ministro por comparti cu Staten cual rapport o estudio a usa como base pa expande e cantidad di camber.

Tambe ta puntra si e ministro a sinta cu e stakeholdernan di comercio, medio ambiente y e parti social pa evalua e efectonan socio-economico y di medio ambiente di e expansion aki. Tambe si a busca sinergia cu e esfuersonan di su homologonan di Asunto Social y Labor, y di Turismo, Salubridad y Deporte, en vista di e actual reto di desempleo na Aruba.

Seguidamente ta puntra si ministro a tene cuenta cu e posible efecto riba disponibilidad di vivienda, scol, salubridad, asistencia social y infrastructura en general, mirando cu mas camber lo requeri mas importacion di hende pa traha den e sector turistico y e sectornan cu ta depende di turismo.

Tambe a tuma nota cu e ministro explicitamente a exclui e proyecto hotelero na San Nicolas (Sero Colorado; red.) y e proyecto di St. Regis for di e total di 2.000 camber menciona. Si e mandatario por splica kico ta e motibo di esaki y si ta premira cu e efectonan socio-economico o di medio ambiente lo ta diferente haciendo e distincion aki.

Ta pidi e ministro tambe pa duna un ‘overzicht’ detaya di inventario actual di camber, camber den construccion y esunnan planea pa e proximo cinco aña, incluyendo nomber di e proyecto, nan ubicacion, desaroyador, e aña den cual a haci e promer peticion y pa ki tempo esunnan cu no ta cla ainda lo keda construi.

Finalmente ta puntra encuanto e contribucion cu e desaroyadornan di proyecto ta obliga di paga como “maatschappelijke bijdrage” tambe den caso di “bouwlaagoverschrijding” , cuanto esaki tabata te cu e momento aki y con a aloca e fondonan aki. Y si por comparti cu Staten un overzicht detaya pa cada proyecto di loke a keda contribui.

Nota di redaccion:
Tocante e ultimo asunto aki, di e contribucion cu ta exigi di cada proyecto como condicion pa nan por haya e tereno pidi o pa ‘pordona’ nan e desviacionnan cu a tuma lugar den construccion, na mas cu un momento Bon Dia Aruba a mustra riba e hecho cu e fondonan aki, cu ta keda distribui entre diferente fundacion y asociacion den cultura, innovacion, deporte, etc. ta carece te awe di un base legal. E hecho cu e ministro mes ta dicidi den cierto caso ken ta e beneficiario segun nos keto bay ta constitui un violacion di ley. Banda di e erfpacht cu e beneficiario ta paga segun e ley no tin ningun stipulacion cu ta duna cualkier mandatario e facultad pa exigi pago, ni pa su mes, ni pa otronan.