E medio digital Cubano, esta Juventud Rebelde (digital@juventudrebelde.cu) a duna cobertura na e bishita cu Prome Minister di Aruba, sr. Mike Eman a haci na e isla comunista den cuadro di e VII Cumbre di Asociacion di Estadonan di Caribe (AEC) cu a clausura na inicio di e siman aki.
E medio digital aki a informa cu e mandatario Arubiano a wordo ricibi pa e Minister di Husticia Cubano, Maria Sther Reus, na Aeropuerto Internacional Jose Marti, na La Habana. Nan a laga sa cu e mandatario local a bisa cu den nomber di su pais y como miembro di e delegacion di Reino Hulandes, e ta atende e encuentro aki cu “nos ruman Caribeño”.
Premier Eman a trece dilanti e laso ancestral entre Aruba y Cuba caminda hopi Arubiano a emigra siglo pasa den tempo dificil pa e isla aki.
Segun e media aki, nos prome mandatario a laga sa cu awendia Aruba ta un pais desaroya unda “nos ta traha pa e bien comun di tur nos ciudadanonan”.
Integracion regional
El a bisa cu e reunion cumbre di AEC tabata un bon momento pa reforsa e lasonan existente cu Cuba y e paisnan bisiña di Caribe y Latino America. Tambe e tabata un ocasion pa “plania ideanan nobo pa futuro”.
E media digital a laga sa cu Premier Eman a destaca e unidad entre pueblonan Caribeño. Tambe e tabata spera un bon resultado di e cumbre aki inspira pa nan dirigentenan y nos creador. Na ultimo, nos prome mandatario a saluda e pueblo Cubano y su gobierno, y el a gradici e organisacion di e evento aki na Cuba.
Na final di e reunion cumbre di AEC a wordo proponi pa declara nos region Caribense como un zona di paz. Aruba ta un pais asocia di AEC, hunto cu Curaçao, Guayana Frances, Guadalupe, Martinica, St. Maarten y Isla Turcas y Caicos. Mientras cu 25 pais Caribeño ta miembro di e asociacion regional aki cu a wordo crea na aña 1994 ora cu a firma e Convenio Constitucional na Cartagena de India, na Colombia.
E meta tras di e creacion di e asociacion aki ta esun di promove e consulta, cooperacion y accion conhunto den e teritorio Caribeño. E proximo reunion extraordinario lo tuma luga na Republica Dominicana, unda nan lo bin cu un simposio tocante preservacion di Lama Caribe.
