Prome Minister Evelyn Wever-Croes, durante e conferencia di prensa di gobierno di Aruba dialuna anochi, a expresa palabranan di gratitud na tur esnan cu incansablemente a duna di nan parti durante a prome fase di Covid-19 y su recuperacion.

“Mirando cu nos ta memey di e prome fase preparando p’e di dos fase, un biaha mas expresando den nomber di Gobierno di Aruba mi ta duna danki na tur esnan cu a yuda nos pa nos a yega asina leu”.

Wever-Croes ta referi na e frontliners. Tur esnan cu a lucha tur dia cu alma y cuerpo pa e resto di comunidad por ta salud y sigur. Tambe ta gradici tur profesional cu ta trahando den tur area pa yuda prepara tambe pa e siguiente parti cu ta bay bin. Sigur tambe, Prome Minister ta gradici pueblo di Aruba completo, na e comunidad en general pa e actitud civico y responsabel cu a demostra den e prome parti di e crisis aki.

“Y manera mi a bisa poco dia pasa, mi ta considera cu nos ta mey mey den e tempestad, den e wowo di horcan aworaki preparando p’e di dos parti y ohala cu nos conta riba e mesun actitud civico y responsabilidad di cada persona den e di dos parti”.

Prome Minister a dirigi tambe palabranan na esnan cu no ta realisa e seriedad di e situacion. Ora nos mira wak bek den fin di siman y cuanto aglomeracion tawata tin riba caya, esaki ta produci preocupacionnan a pesar cu nos a haña nos libertad. Nos no tin samenscholigsverbod, toque de queda ni shelter in place aworaki, kiermeen tur esaki ta posibel pero ta keda consehabel y responsabel pa ta cauteloso y hacie na midi.

“Ban keda aplica reglanan di higiena, laba man frecuentemente pa si bo bin den contacto mes cu un hende cu tin e virus, bo no trece na bo cara y pega cu n’e. Tambe sigui regla di distanciamento, tene distancia di otronan ora bo ta combersa cu otro hende pasobra bo no sa si e por tin e virus. Si nos keda tene nos mes na e reglanan aki, mi tin tur confiansa cu e di dos parti tambe nos lo bay bon”, Wever-Croes a enfatisa.

LEAVE A REPLY

Please enter your comment!
Please enter your name here