Premier Evelyn Wever-Croes a reacciona preocupa riba e Rapport di Algemene Rekenkamer riba e proyectonan PPP. Specificamente riba e hecho cu Algemene Rekenkamer ta cuestiona cu gobierno anterior no a duna informacion na Parlamento.

Es mas, ARA ta constata awor cu gobierno anterior no a duna Parlamento e informacion cu Parlamento mester pa por haci su trabou debidamente, segun un comunicado di gobierno.

Den su Rapport, Algemene Rekenkamer a haci dos acusacion serio contra gobierno anterior.

  1. Sconde informacion:
    ARA ta remarca cu tin hopi informacion detaya y tiki informacion riba riesgonan financiero a largo plaso y e medidanan pa limita e riesgonan aki. “Esaki ta algo hopi serio y tabata conoci cu durante Gabinete Mike Eman I y II e gobierno tabata manipula cu Parlamento. Oposicion tabata critico, pero tabata wordo bari for di mesa constantemente”, segun e comunicado.
  2. No a duna parlamento bista di e gastonan real.
    E di dos acusacion serio ta cu gobierno anterior no a duna Parlamento un bista completo di e gastonan y tampoco ta haya informacion presupuestario y di financiamento riba termino largo. “Y esaki ta e motibo cu nos pais a yega te na un abismo financiero, mientras e Parlamentarionan di AVP tabata sinta un banda y bati man.”

“Mi ta lamenta cu e acusacionnan aki a bin asina laat. Tempo cu mi tabata den Parlamento mi a papia hopi di esaki pero e mayoria den Parlamento e tempo ey no kier a asumi su responsabilidad, es mas, nan a permiti e gobierno anterior comete tur e erornan aki. Ta tristo pa constata awor e daño cu e gobierno di AVP a causa Aruba. Awor nos tin un situacion full diferente. Nos tin un Parlamento critico, cu ta eherce nan trabou di Parlamentario cu seriedad y dedicacion. Esey ta un condicion hopi importante pa garantisa un democracia solido. Mi ta preocupa pa e consecuencianan di e mal maneho di gobierno anterior, y mi ta mas determina cu nunca pa fortifica nos institutonan pa garantisa democracia, bon gobernacion y finanzas publico saludabel”, Wever-Croes a finalisa bisando.