Un homber cu un arma ilegal a mata 6 persona y herida tres persona na un hospital na Republica Checo. E homber despues a tira su mes ora Polis tabata acerca na su auto, segun prome minister y oficialnan a bisa.

Prome Minister Andrej Babis a bisa riba television publico cu e tiramento a tuma luga pa 7 am na un hospital su sala di espera. E sospechoso a cuminsa tira di cerca riba cabes di hende. Babis a bisa cu el a cancela su bishita oficial pa Estonia pa bay na e luga di e atake, na University hospital na Ostrava, 350km di Praga. El a bisa cu a duna tratamento na e sospechoso na hospital, pero no a duna detaye. “Ta un tragedia grandi, un acto individual y desafortuna. Ningun hende ta compronde e motibo di e sospechoso”, Babis a bisa.

Minister di Asunto Interior Jan Hamacek a bisa cu Polis a haya e sospechoso su auto. El a tira su mas na cabes ora Polis tabata acercando. Hamacek a bisa cu Polis ta investigando e motibo, y cu ‘mi kier duna e publico siguridad cu no tin mas peliger’.

Polis a identifica e agresor como un homber di 42 aña di edad. Centenares di agente policial a cuminsa un buskeda extensivo y a haci uzo di dos helicopter. Hefe di Polis Regional, Tomas Kuzel, a bisa cu sospechoso a uza un arma di candela ilegal di 9 mm traha na Republica Checo. Kuzel a bisa cu e sospechoso, kende tin un record criminal, a actua su so.

Polis a publica un potret di e sospechoso, despues di retira un potret anterior di otro homber. Nan a bisa cu persona ey awo ta considera un testigo.

Director di e clinica, Jiri Havrlant a bisa medionan di comunicacion cu esunnan cu a fayece tabata 4 hende homber y dos hende muhe. Tur victima tabata pashent adulto wardando pa tratamento.

E nacion lo honra e personanan aki cu zonido di sirena rond di henter e pais riba dia 17 di december, Babis a bisa.

 

LEAVE A REPLY

Please enter your comment!
Please enter your name here