E situacion den WEB Aruba N.V. pa loke ta trata e parti financiero pa atende cu proyectonan importante ta mustra uno preocupante. Te hasta tin indicacion cu lo por costa eventualmente e retiro di e director financiero, pero di otro mas, di e compania di utilidad aki.

E echo aki ta mustra cu e situacion interno aki lo por cuminsa scala, principalmente ora cu e hunta di comisario di Utilities lo cuminsa responsabilisa algun miembronan di staf, manera a yega di sosode na Elmar y RdA.

Ta wordo menciona un suma cuantioso di alrededor di 500 miyon florin, caminda e parti di financiamento ta hayando problema. Normalmente AIB Bank ta financia e tipo di proyectonan di WEB N.V. Pero informacion cu a drenta cerca e matutino aki ta mustra cu Banco Central Aruba a bin cu algun obhecion y a saca bandera cora pa e grupo cu ta solicitando esaki. Aparentemente parti di esaki tin di haber cu algun situacion cu a wordo presenta den algun proyecto, y cu tin di haci cu e mesun grupo Finance Quest, y cu nan ta wordo tambe investiga den e caso asina yama ‘Avestruz’.

Minister Ruiz-Maduro.
Siman pasa minister di Finansa y Economia, Xiomara Ruiz-Maduro a tene un reunion di WEB N.V, unda el a haya un presentacion. Pero den e presentacion aki, nada a wordo papia ariba e financiamento mes di cuanto e proyectonan ta bay costa pa garantisa e suministro di awa y coriente, segun e mandatario. Pero tampoco con nan ta haci pa yega na e placa, ariba ‘esey e combersacion no a bay,’ e mandatario a bisa.

El a declara na Bon Dia Aruba cu den e presentacion aki, nan a papia di nan inversionnan cu nan a haci for di 2005 bin ariba pa por crea eficiencia pa suministra awa potabel y produci energia. Pero tambe con e inversion aki a wordo refleha den menos uzo di azeta pisa of HFO. Igualmente riba kico nos lo por spera den e transformacion di e planta aki pa bay riba gas.

El a bisa cu e presentacion cu WEB N.V. a haci tabatin presencia di stakeholdernan, pero den e caso aki, como Minister di Finanzas y Economia, como tambe gobierno; e mandatario tabata envolvi como stakeholder. E mandatario a bisa cu nan no a bay riba detaye financiero.

Preocupacion financiero.
E echo cu un grupo di trahadonan di WEN N.V. di e nivel di staf y expertonan di e compania estatal aki ta bay den prensa pa vocifera nan preocupacion den social media di e portal di noticia 24ora, ta un indicacion fuerte cu e situacion no ta mucho bon.

Nan ta un asociacion cu ta representa mas cu un 75% di staf di e personal profesional di WEB Aruba, y nan ta profesionalnan envolvi den proyectonan importante pa garantisa produccion di awa y coriente. Nan preocupacion tin cu haci cu financiamento di varios proyecto grandi. Si no tin claridad, algun proyecto grandi pa garantisa e produccion di awa y coriente, lo por cay. Esaki debi cu no tin claridad riba financiamento di nan entrante januari otro aña, mientras cu e invoicenan ta cuminsa drenta.

E asociacion aki a saca un comunicado diadomingo merdia caminda nan ta trece nan preocupacion riba e rumbo cu a tuma e financiamento di proyectonan grandi di WEB N.V. Richard Frank cu ta presidi e asociacion aki a laga sa cu esaki no ta un secreto cu nan ta bin presentando nan proyectonan pa futuro den beneficio di nos comunidad.

E financiamento a wordo tuma unilateralmente pa Utilities NV, y mirando cu e tempo ta core, nan a yega di manda dos carta pa Richard Eman, kende ta e director interino di Utilities NV, y te dia di awe nan no a haya contesta riba nan preocupacion. P’esey nan a dicidi di haci nan preocupacion publico ya cu nan ta sinti cu e transparencia no t’ey.